Kryeministri i Kosovës, Albin Kurti gjatë vizitës në Norvegji është takuar me mërgimtarët atje, përcjell InLajmi.
Kurti tha se mërgata i është gjendur pranë Kosovës në kohë të mira e të vështira, sa herë që ajo ka pasur nevojë.
Gjatë takimit u bisedua për thellimin e bashkëpunimit ndërmjet institucioneve dhe mërgatës në fushën e arsimit, investimeve dhe inovacionit.
Në fund, kryeministri falënderoi të gjithë mërgatën për kontributin e tyre deri tani.
Postimi i plotë i tij:
Çdoherë kur Kosova ka pasur nevojë, mërgata ka qenë pranë saj, në kohë të mira e të vështira. Mbrëmë në ambientet e ambasadës së Kosovës në Oslo, në kuadër të “Dialogut me Mërgatën” zhvilluam një bashkëbisedim me përfaqësues të shoqatave, mësues të gjuhës shqipe, profesionistë të shquar të fushave të ndryshme, aktivistë politikë si dhe pjesëtarë nga komuniteti shkencor dhe akademik.
Dialogu me mërgatën ka për qëllim riimagjinimin e partneriteteve me bashkatdhetarët tanë dhe thellimin e bashkëpunimit ndërmjet institucioneve dhe mërgatës në fushën e arsimit, investimeve dhe inovacionit.
Të pranishmit i falënderova për kontributin dhe i informova për punën njëvjeçare të qeverisë si dhe rolin që mërgata ka marrë në kuadër të programit qeveritar, për sukseset dhe sfidat e përbashkëta. /InLajmi/
