Ministrja e Drejtësisë, Albulena Haxhiu do të shkojë në Hagë të Holandës për t’i vizituar ish-krerët e UÇK-së në paraburgimin e Gjykatës Speciale.
Bashkë me ministren Haxhiu, për në Hagë do të udhëtojnë edhe nënkryetarja e Kuvendit, Saranda Bogujevci, kryetari i Komisionit për Legjislacion, Adnan Rrustemi, si dhe deputeti Erxhan Galushi.
Ministria e Drejtësisë tha se delegacioni me në krye ministren Albulena Haxhiu do të takohet me të gjithë ish-pjesëtarët e UÇK-së që po mbahen në paraburgim, përceç ish-presidentit Hashim Thaçi, ish-kryeparlamentarit Kadri Veseli dhe ish-shefin e inteligjencës së FSK-së, Salih Mustafa.
“Delegacioni nga Republika e Kosovës do të takohet me Jakup Krasniqin, Rexhep Selimin, Hysni Gucatin, Nasim Haradinajn dhe Pjetër Shalën”, thuhet në përgjigjen e MD-së.
Vizitat do të zhvillohen më 30, 31 mars, dhe 1 prill.
Është hera e 2-të që Thaçi, Veseli e Mustafa nuk do të takohen me përfaqësues të Ministrisë së Drejtësisë.
Në fund të vitit të kaluar, ministrja Haxhiu pati thënë se zyrtarët e Ministrisë së Drejtësisë kishin udhëtuar për në Hagë ku ishin takuar me të akuzuarit, por se Thaçi dhe Veseli nuk kishin dashur takim me ta, thuhet nga Ministria e Drejtësisë në një përgjigje për Gazetën Express.
“Ne kemi pasur një vizitë në Gjykatën Speciale, përpos Thaçi dhe Veseli që nuk kanë dashur të takohen me përfaqësuesit e Ministrisë së Drejtësisë, kemi takuar Krasniqi, Selimi dhe Gucati. Thaçi e Veseli nuk kanë dashur të takohen me përfaqësuesit e Ministrisë së Drejtësisë”, kishte thënë Haxhiu.
