Kryetari i Komunës së Podujevës, Shpejtim Bulliqi thotë se po të varej nga ai personalisht, punimet në magjistralen Podujevë – Prishtinë do të përfundonin brenda vitit 2022. I pari i Komunës vlerëson se sa i përket rrugës Podujevë – Prishtinë përgjegjësia i takon nivelit qendror, jo atij lokal.
Bulliqi tha se sa i përket punimeve në këtë rrugë Komuna që ai udhëheq nuk ka përgjegjësi, pasi sipas tij kjo është kompetencë e Ministrisë së Infrastrukturës.
“E kam dëgjuar deklaratën e Besnik Tahirit dhe mendoj se ajo i drejtohet Ministrisë së Infrastrukturës, kjo pasiqë dihet se Komuna nuk ka kompetenca për një magjistrale, por ajo i takon Ministrisë së Infastrukturës”, thekson Bulliqi.
Lidhur me punimet në këtë rrugë, Shefi i Grupit Parlamentar të AAK-së, Besnik Tahiri dje deklaroi se Kryeministri i Kosovës, Albin Kurti dhe Ministri i Mjedisit, Planifikimit Hapësinor dhe Infrastrukturës, Liburn Aliu në fushatën zgjedhore kishin premtuar rregullimin e rrugës Podujevë – Prishtinë, por sipas Tahirit pas fushatës “nuk është çitë asnjë guri e asnjë baski” në këtë rrugë.
Veç të tjerash, i pari i Komunës së Podujevës, Shpejtim Bulliqi tha se po të varej nga ai, rruga Podujevë – Prishtinë do të përfundonte në fund të vitit.
“Unë një gjë mund ta them se po të varej nga unë personalisht, kjo rrugë do të përfundonte në fund të këtij viti, por siç e thash edhe më herët, kjo nuk varet nga Komuna jonë”, thotë Bulliqi.
Sa i përket buxhetit për këtë rrugë, Kryetari i Komunës së Podujevës vlerëson se buxheti është ndarë dhe punimet po vazhdojnë, por që janë ndaluar për shkaqe atmosferike.
“Punimet nuk janë ndalur. Ato vazhdojnë, por deri tash nuk kanë mundur të punojnë për shkak se kushtet atmosferike nuk e kanë lejuar një gjë të tillë. Ajo çka mund të them është se ne kemi pasur takime edhe me Ministrin e Infrastrukturës dhe kemi ndarë mjetet buxhetore dhe shpresojmë se do të fillojnë punimet në këtë rrugë”, potencon Bulliqi.
Ndryshe nga Ministri Aliu, edhe Kryeministri Kurti kishte thënë se rruga Podujevë – Prishtinë do të përfundojë gjatë vitit 2022.
Zgjerimi i rrugës magjistrale Podujevë – Prishtinë e njohur edhe si N25, ka filluar në vitin 2016 dhe ishte paraparë që të përfundojë për 3 vjet, tha Bulliqi për Reporteri.net.
Mirëpo, edhe pse kanë kaluar 6 vite kjo rrugë për shkak të pengesave rreth shpronësimeve ende nuk ka përfunduar.
