Roman Abramovich raportohet të jetë helmuar bashkë me një prej negociatorëve ukrainas dhe madje përfundoi i shtruar edhe në një spital në Turqi disa javë më parë.
Oligarku rus raportohet se u helmua pasi ishte takuar në Kiev me ukrainasit, teksa po përpiqej të luante rolin e “paçebërësit” pas nisjes së pushtimit rus.
Pronari i Chelsea-t humbi edhe shikimin për disa orë, për shkak të dhimbjeve të forta.
Miliarderi u shtrua në një spital në Turqi për t’u kuruar. Përveç tij, edhe 2 persona të tjerë që morën pjesë në bisedimet për paqe më 3 mars pësuan simptoma të ngjashme, konfirmuan analistët e “Bellingcat”.
Sipas tyre, këto janë simptoma që vijnë si pasojë e helmimit me armë kimike.
Të 3 personat, mes të cilëve një tjetër sipërmarrës rus dhe deputeti ukrainas Rustem Umerov, kishin konsumuar vetëm çokollatë dhe ujë disa orë para se t’i shfaqeshin simptomat. Një person i 4 që kishte konsumuar të njëjtat produkte nuk shfaqi asnjë simptomë, shkruan The Guardian.
Të nesërmen, më 4 mars, Abramovich, Umerov dhe një tjetër negociator, shkuan me makinë nga Kievi për në Lviv, për të kaluar më pas në Poloni dhe në Stamboll, për të vijuar negociatat, transmeton A2CNN.
Burimet e “WSJ” thanë se helmimi mund të ketë ardhur nga agjentë radikalë rusë, të cilët donin që të prishnin bisedimet e paqes, në mënyrë që lufta të vazhdonte.
