Presidentja e Republikës së Kosovës, Vjosa Osmani Sadriu është takuar me kryeministrin e shtetit të Katarit, Sheikh Khalid bin Khalifa bin Abdulaziz Al Thani, gjatë pjesëmarrjes në Forumin e Dohas, përcjell InLajmi.
Presidentja ka vlerësuar lartë marrëdhëniet miqësore në mes të 2 vendeve. Në kontekstin e Forumit të Dohas, Presidentja Osmani ritheksoi përpjekjet e përbashkëta të Kosovës dhe Katarit si 2 vende paqedashëse, gatishmërinë për t’i adresuar sfidat bashkëkohore.
Presidentja falënderoi Kryeministrin për mbështetjen ndaj Kosovës që nga paslufta, duke përfshirë realizimin e projekteve të ndryshme të financuara nga populli dhe shteti i Katarit.
Po ashtu, Presidentja Osmani shprehu gatishmërinë e institucioneve tona të thellojnë bashkëpunimin ekonomik dhe tregtar me Shtetin e Katarit.
Më tej, Osmani vlerësoi rolin e rëndësishëm të Katarit në mbështetjen e Kosovës në iniciativa të ndryshme ndërkombëtare.
Po ashtu potencoi nevojën për të avancuar bashkëpunimin diplomatik duke u anëtarësuar edhe në organizata ndërkombëtare në të cilat akoma nuk jemi të përfaqësuar si dhe duke e rritur numrin e njohjeve për pavarësinë e Kosovës./InLajmi/
