Njëra nga masakrat e shumta të mëdha që ka ndodhur në Kosovë nga forcat serbe është edhe masakra e Krushës së Madhe në Rahovec, përcjell InLajmi.
Në këtë masakër paramilitarët serbë nuk kursyen as gra, fëmijë e mosha të shtyra, derisa numri i të vrarëve shkoi në 241.
Kryeministri i Kosovës, Albin Kurti këtë të shtunë, nga Krusha tha se kjo masakër e cila ndodhi para 23 viteve , mu në fillim të bombardimeve të NATO-s, me gjithë forcën që e kemi parë për ta përballuar, nuk e ka zhdukur dhimbjen.
“Ajo nuk ka diçka që është e tejshkuar e jonë e largët, por veçse pjesë e realitetit tonë të përditshëm”, tha Kurti, në tubimin përkujtimor në shënim të 23-vjetorit të masakrës në Krushë të Madhe.
Duke thënë se Kosova është e shënuar e tëra, në trupin dhe në kohën e vet, nga vrasja e shënjestruar dhe nga vrasja masive, masakra, kryeministri deklaroi në emër të qeverisë që drejton se e ka shumë të qartë përmasën e punës që duhet të kryejmë.
Ai theksoi se të gjithë së bashku, qeveria dhe qytetarët, duhet të vendosen në të njëjtin parim e në të njëjtën sjellje.
“Na duhet të realizojmë një shtet që e llogarit ndërtimin e vet në radhë të parë mbi drejtësinë për viktimat e Kosovës”, tha kryeministri.
Duke u drejtuar grave të zonja nga Krusha, ai tha se sakrificat e mosdorëzimi i tyre, gjetja e shpresës në thelb të dhimbjes janë mësim jete për të gjithë ne.
“Që jeta do të jetojë dhe e drejta do të fitojë është mësimi që na e japin gratë e Krushë”,tha kryeministri Kurti./InLajmi/
