Kryeministri i Kosovës, Albin Kurti bashkë me kryetarin e Kuvendit, Glauk Konjufcën, kanë bërë homazhe te busti i ish-sekretares së Shtetit amerikan, Madeleine Albright, e cila dje ndërroi jetë mbrëmë në moshën 84-vjeçare, përcjell InLajmi.
Kurti tha se se politika, diplomacia dhe historia vështirë se kombinohen në një mënyrë më të përsosur sesa te personaliteti i jashtëzakonshëm i ish-sekretares amerikane Madeleine Albright.
Gjithashtu ai tha se Albright në politikë ishte historiane, në histori ishte diplomate ndërkaq në diplomaci ishte politikane.
Kryeministri i vendit u shpreh mirënjohës ndaj kontributit te Madeleine Albright për Kosovën, e cila pati një rol të rëndësishëm në NATO dhe kontribuoi që gjenocidi serb të merrte fund në Kosovë.
Postimi i plotë nga Zyra për Komunikim Publik
Kryeministri i Republikës së Kosovës, Albin Kurti bashkë me kryetarin e Kuvendit të Republikës së Kosovës, Glauk Konjufca, kanë bërë homazhe te busti i ish Sekretares së Shtetit amerikan, Madeleine Albright, e cila dje ndërroi jetë.
Pas nderimit që i bënë mikes së madhe të popullit të Kosovës, kryeministri Kurti tha se politika, diplomacia dhe historia vështirë se kombinohen në një mënyrë më të përsosur sesa te personaliteti i jashtëzakonshëm i Sekretares Madeleine Albright.
“Dija e saj e thellë, mendja e mprehtë, dashuria e paepur për të drejtat dhe liritë e qytetarit në republikë, orientimi i saj për demokracinë sociale dhe gjithashtu edhe njohuritë e jashtëzakonshme për gjeopolitikën, e bëjnë një personalitet i cili do të kumbojë gjatë jo vetëm në politikën dhe qeverisjen në Shtetet e Bashkuara të Amerikës e te ne në Kosovë po edhe në shumë vende tjera të botës”, tha kryeministri Kurti.
Para mediave, kryeministri Kurti ka potencuar se ndërhyrja e NATO-s për të ndalur gjenocidin në Kosovë me bombardimet kundër Jugosllavisë dhe Serbisë së Millosheviqit, padyshim që mbanë vulën e zonjës Albright dhe për këtë ne do të jemi përjetë falënderues e mirënjohës. /InLajmi/
