Ish-ministri i Mjedisit Dardan Gashi ka dalë në krahë të kryeministrit Kurti sa i përket vendimit të Kurtit për të mos lejuar mbajtjen e zgjedhjeve serbe në Kosovë.
Gashi ka thënë se askush serbëve nuk ua ka mohuar të drejtën e votimit.
“Askush nuk iu ka thënë serbëve të Kosovës se nuk keni të drejtë votimi për zgjedhjet e Serbisë. Është mohuar qasja e Serbisë ndaj Kosovës. Është mohuar që Serbia ta trajtojë Kosovën si territor të vetin”, tha ai.
“Sigurisht se kjo është pozitë delikate. Nëse Albin Kurti do të hiqte dorë nga qëndrimi për zgjedhjet serbe, sigurisht se 3-4 nga ne në këtë studio do i kishim çarë kokën. Kjo është ajo “hip se të vrava, zbrit se të vrava” në këtë situatë”, tha ai në RTV Dukagjini.
Gashi thotë se Serbia refuzoi edhe të diskutojë me Kosovën këtë temë me arsyetimin “nëse doni na lejoni, nëse jo, ju jeni fajtorë”.
