Presidentja e vendit, Vjosa Osmani është shprehur e tronditur nga lajmi për vdekjen e ish-sekretares së SHBA-së dhe njëherësh mikeshes së Kosovës, Madeleine Albright, përcjell InLajmi.
Osmani theksoi se Albright dha kontribut të rëndësishëm për Kosovën sepse e njohu dhimbjen e popullit tonë, duke qenë se vet e kishte përjetuar persekutimin qysh në fëmijëri.
“Ajo na dha shpresë, kur nuk e kishim atë, u bë zëri ynë e krahu ynë kur nuk kishim as zë e as krah”, tha ajo.
Presidentja e vendit tha se sekretarja amerikane e kishte përkrahur Kosovën deri në frymën e fundit.
Në fund Osmani shtoi se Albright do të mbetet modeli i një heroine të pamposhtur e guximtare, që do ta ndjekin shumë breza.
Postimi i plotë i saj:
E tronditur thellësisht nga humbja e mikes së madhe të Kosovës, Madeleine Albright, ish- sekretare e Shtetit të SHBA-ve. Ajo na dha shpresë, kur nuk e kishim atë, u bë zëri ynë e krahu ynë kur nuk kishim as zë e as krah. E njohu dhimbjen e popullin tonë sepse edhe vet e kishte përjetuar persekutimin qysh në fëmijëri, prandaj qëndroi e vendosur kundër Millosheviqit deri në ndaljen e gjenocidit të tij në Kosovë. E përkrahi parreshtur Kosovën deri në frymën e fundit, prandaj populli i Kosovës do ta kujtojë përjetësisht.
Modeli i saj i një heroine të pamposhtur, guximtare e të vendosur për të mbjellur vlerat demokratike në çdo vend, do të mbetet përherë modeli që do e ndjekim ne që patëm fatin ta njohim si dhe shumë breza pas nesh. /InLajmi/
