Downing Street ka fajësuar publikisht Kremlinin se qëndron pas thirrjeve mashtruese që synojnë ministrat britanikë, transmeton InLajmi.
Sekretari i Mbrojtjes, Ben Wallace dhe Sekretari i Brendshëm, Priti Patel thanë se ata ishin shënjestruar nga thirrjet e mashtruesve javën e kaluar.
Zëdhënësi i kryeministrit tha: “Shteti rus ishte përgjegjës për thirrjet telefonike të rreme të bëra me ministrat e Mbretërisë së Bashkuar javën e kaluar.
“Kjo është praktikë standarde nga operacionet ruse të dezinformimit dhe është një taktikë direkt nga libri i lojës së Kremlinit për të tentuar të shpërqendrojë vëmendjen nga aktivitetet e tyre të paligjshme në Ukrainë dhe nga abuzimet e të drejtave të njeriut që po kryhen atje.
“Ne po shohim një varg historish shpërqendruese dhe gënjeshtrash të qarta nga Kremlini, që pasqyrojnë dëshpërimin e Putinit teksa ai kërkon që të fshehë dështimet e Rusisë në fushën e betejës”, shkruan BBC.
Wallace kishte thënë më parë se besonte se Rusia qëndronte pas një telefonate që ai mori, duke pretenduar se ishte nga kryeministri ukrainas, por kjo është hera e parë që qeveria e Mbretërisë së Bashkuar fajëson drejtpërdrejt administratën e Vladimir Putin. /InLajmi/
