Kanë kaluar mbi 100 ditë prej kur Përparim Rama nga Lidhja Demokratike e Kosovës, mori timonin për të udhëhequr kryeqytetin e Kosovës, Prishtinën. Por, si është parë puna e Ramës gjatë kësaj periudhe, nga Lëvizja Vetëvendosje- subjekt në të cilin Përparim Rama kishte kundërkandidatin kryesor, Arben Vitinë?
Për këtë temë, këtë të hënë ka folur shefi i asamblistëve të Lëvizjes Vetëvendosje Gëzim Sveçla.
“Nuk kam parë asnjëherë kaq shumë mbeturina në Prishtinë”, është fjalia me të cilën ky përshkruan mospunën e Ramës. Sipas tij, asnjë projekt serioz nuk ka filluar, prej kur ka filluar punën kryetari i ri.
“Për cilat projekte flet zotëri Rama? Asnjë projekt nuk ka filluar, e vetmja gjë, ka qenë vizita në rrugën “Muharrem Fejza”. Është iniciuar me deklaratë fillimi i rrugës A, nuk ka pasur asnjë zhvillim tjetër. Në anën tjetër dihet si fillon një projekt, bëhet studimi i fizibilitetit, nuk ka pasur asnjë lëvizje” u shpreh Sveçla.
Ndonëse gjatë së hënës është emëruar në Drejtorinë e Kulturës, një drejtoreshë nga radhët e Partisë Demokratike të Kosovës, asamblisti i LVV-së, shprehet se ka moskoordinim mes 2 subjekteve.
Sipas tij, një gjë e tillë ka ndodhur para disa ditësh, ku drejtoritë përkatëse nuk kishin informacione për këto zhvillime.
“Nuk po themi që Përparimi ka sjellur problemet, por mos të harrojmë që…Disa pjesë të programit të Uranit, janë pjesë e atij të LDK-së. Asnjëherë ky koalicion nuk i ka sjellë të mira Prishtinës, ka moskoordinim mes drejtorive të ndryshme. Parku i Gërmisë ka lëshuar leje për një produksion filmik, pas një ankese u vërtetua që lejet i lëshon Drejtoria e Parqeve, të cilët nuk kishin lidhje dhe mungesë bashkëpunimi” tha ai në emisionin Frontal në T7.
Asamblisti i LVV-së, ka kritikuar kryetarin Rama se ka larguar programin e tij për Prishtinën, menjëherë pas përfundimit të zgjedhjeve.
