Ministri ukrainas i Mbrojtjes, Oleksii Reznikov, ka thënë se Rusia po kryen terrorizëm shtetëror në Ukrainë dhe se do të vazhdojë të sulmojë edhe vende të tjera.
Gjatë një vizite në Londër, Reznikov, derisa ishte duke folur me sekretarin e Mbrojtjes së Britanisë së Madhe, Ben Wallace, ka thënë se 150 fëmijë ukrainas ishin vrarë prej fillimit të luftës nga Rusia.
Ai tha se më shumë se 400 shkolla dhe kopshte dhe më shumë se 110 spitale ishin shkatërruar.
“Mijëra e mijëra civilë janë vrarë”, ka thënë Reznikov, duke shtuar se nuk dihet saktësisht se sa ukrainas janë ende të bllokuar nën rrënojat e shtëpive të shkatërruara, shkruan BBC.
“Ky është një terrorizëm shtetëror. Kjo është arsyeja pse Kremlini duhet të ndalet, sepse ai do të shkojë më tej. Ai do të sulmojë vendet e tjera”, tha Reznikov, transmeton KlanKosova.
Tutje, ai shtoi se ushtarët ukrainas i kanë shkatërruar pothuajse 500 tanke ruse dhe më shumë se 1.500 automjete të blinduara luftarake.
