Sulmuesi i Kombëtares së Kosovës, Vedat Muriqi gjatë një interviste ka folur rreth eksperiencës së tij me klubin e Lazios dhe momentet e mira që është duke kaluar në Spanjë me skuadrën e Mallorcas, ai ndër të tjera la të hapur mundësinë e një rikthimi në Turqi vitet e ardhshme.
I huazuar gjatë afatit kalimtar të janarit nga skuadra e Lazios në Mallorca gjiganti kosovar, Vedat Muriqi gjatë një interviste për Lig Radio ka treguar se fillimisht para se të transferohej në Spanjë kishte pasur ankth por tani është duke kaluar momente të mira dhe është ambientuar me klubin e ri.
Ndër të tjera ai tha:
”Para se të vija në Mallorca, kisha shumë ankth, por bëra shumë kërkime. Pasi erdha, u lumturova shumë. Njerëzit, qyteti, klubi gjithçka është shumë e bukur. Klubi është veçanërisht shumë i organizuar.”
Mallorca gjendet në vendin e 17-të dhe është duke luftuar për mbijetesë këtë edicion, për këtë ka folur edhe vet 27-vjeçari i cili tregoj se ky është objektivi i tij këtë edicion, por pastaj do të shikoj se çfarë do të bëj me karrierën e ti.
Ai shtoi:
” E mbaj skuadrën në ligë deri në fund të sezonit dhe më pas jam i interesuar për karrierën time. Nëse ka marrëveshje do të doja të vazhdoja këtu. Do të doja të luaja në ekipe që luajnë vazhdimisht në elitë. Sidoqoftë kam pasur eksperienca te ngjashme me Gençlerbirliği dhe Rize më parë, tani dua t’i përdor këto eksperienca këtu dhe të luaj një rol për të mbajtur skuadrën në ligë.”
Më tutje ai foli edhe pse ishte arsyeja që nuk luante tek Lazio, duke thënë:
” Unë pata një takim me Sarrin, i thashë atij që nëse nuk jam duke punuar në stërvitje më tregoni, do të punoj siç thoni ju, por ai më tha që është i kënaqur por nuk është pjesë e lojës së tij sepse dëshiron sulmues të shkurtër dhe të shpejtë.”
Në fund ai tregoi që do të rikthehet një ditë në Turqi sepse kishte kaluar momente shumë të mira atje, ai tha: ”Sa herë që nuk kam luajtur në Lazio, kam dashur të luaj në Turqi si i huazuar. Kjo nuk funksionoi. Më duhet patjetër të jetoj në Turqi pas pensionimit. Unë jam 28 vjeç, por patjetër që një ditë dua të kthehem në Turqi. Aty kalova 8 vite dhe aty ndërtova jetën.”
Kujtojmë që Muriqi para se të shkonte në Turqi karrierën e kishte filluar tek Liria e Prizrenit, pastaj kishte kaluar tek Teuta e Durrësit, teksa më vonë kishte luajtur edhe për Besën e Kavajës, përcjell Gazeta Metro.
Muriqi që nga transferimi i tij në Mallorca ka luajtur në 8 ndeshje duke shënuar edhe 2 gola dhe një asistim, por megjithatë është kthyer në një rol kyç në ekipin e tij.
