Kryeministri i Kosovës, Albin Kurti dhe Kancelari i Austrisë, Karl Nehammer kanë mbajtur një konferencë të përbashkët për media, derisa kanë theksuar raportet e mira që kanë këto 2 shtete, raporton InLajmi.
Kurti tha se Kosova duhet të përfitojë më shumë nga fondet e Këshillit Evropian, derisa në theks të veçantë ai tha se fondet e BE-së duhet të jenë me vlerat e Bashkimit Evropian në mënyrë që të ketë stabilitet.
Por, kryeministri i pyetur nga gazetarët ka folur rreth luftës e Rusisë në Ukrainë, tha se si shtet ndjehen të brengosur se nga lufta hibride e hegjemonisë ruse mund të rrezikohet edhe Kosova.
“Nuk ka dyshim që autokracia e cila zhvillonte luftë hibride e udhëhequr nga Kremlini është shndërruar në një depozitim që bënë luftë duke e shkelur çdo normë ndërkombëtare e njerëzore dhe në të njëjtën kohë pa qenë e provokuar dhe në mënyrë të pajustifikueshme sulmon një komb e një shtet tjetër. Ne jemi të shokuar nga pamjet në Ukrainë”, tha Kurti.
Më tej, Kurti tha se derisa më herët presidenti rus, Vladimir Putin e ka përmendur Kosovën një herë në muaj tash po e përmend në çdo javë.
“Në të kaluarën presidenti Putin na ka përmendur një herë në muaj e tash po na përmend një herë në javë. Pra, ai i cili e kundërshtoi ndërhyrjen e NATO-s dëshiron ta keqpërdorë rastin e Kosovës për ta ushtruar hegjemoninë e vet. Jemi të brengosur por jo të frikësuar, populli jonë është bashkë, së bashku edhe me Aleancën Euroatlantike, me Bashkimin Evropian”, tha Kurti.
Megjithatë Kurti tha se Putin nuk dëshiron të ulet në tryezën e bisedimeve vetëm me presidentin ukrainas Volodymyr Zelenskyn por edhe me presidentin amerikan Joe Biden.
“Përshtypja është që presidenti rus dëshiron të ulet në tryezën e negociatave jo me presidentin ukrainas Volodymyr Zelensky por me Joe Biden, për ky qëllim i tij që do t’i përngjante një ‘Jalta 2’, dhe unë kam drojën që ai do ta intensifikojë luftën në Ukrainë, por edhe ta shpërndajë diku tjetër sepse ai nuk mund të ulet dot në tryezën e negociatave vetëm për invazionin në Ukrainë. Ballkani Perëndimor është i rrezikuar dhe ka luftë hibride. Në Nish është një një qendër aktive me agjentë rus, ne jemi të brengosur por po e përsëris nuk jemi të frikësuar”, tha Kurti./InLajmi/
