Presidentja e Kosovës, Vjosa Osmani-Sadriu do të pres në takim gjatë ditës së sotme një delegacion nga Shtëpia e Bardhë, shkruan InLajmi.
Delegacioni nga Shtëpia e Bardhë do të jenë kryesisht nga Këshilli i lartë për Siguri Kombëtare.
Se a mund të jetë temë e takimit të sotëm të delegacionit me të parën e shtetit, Osmani-Sadriun siguria në vend, gjegjësisht rreziku që mund t’i kanoset vendit tonë, nga Serbia, analisti politik, Nexhmedin Spahiu në një prononcim për Gazetën InLajmi tha se nuk mendon se vendi jonë mund të rrezikohet tani për tani nga fqinji serb.
“Jo, nuk mendoj se Kosova rrezikohet nga Serbia derisa të zgjatë lufta në Ukrainë. Megjithatë, pasi që të përfundojë lufta në Ukrainë mendoj se ekziston një rrezik real për një gjë të tillë në Kosovë, pasi që do të varet krejt se si do të jetë epilogu i luftës në Ukrainë. Në të 2-ja rastet, pra në rast të fitores të Rusisë, Serbia do të ndjehet më e fuqishme dhe ekziston mundësia që Serbia të ndërmarrë veprime ndaj Kosovës por edhe në rast se Rusia e humb luftën në Ukrainë atëherë Perëndimi do të jetë më i relaksuar dhe më nuk do të merret me Serbinë sepse nuk do ta shohë atë si rrezik për sigurinë e Perëndimit”, tha analisti Spahiu.
Por, në rast se Rusia e humb luftën ndaj Ukrainës, atëherë, Spahiu thotë se Perëndimi nuk do t’i bëj presion më Serbisë në masën çfarë është tani dhe pas kësaj Kosova do të duhej të përballej e vetme me Serbinë. Pra pa ndihmën e Perëndimit. E krejt kjo sipas tij përbën rrezik për Kosovën.
Megjithatë, sipas Spahiut derisa po vazhdon lufta në Ukrainë, Kosova e ka shancin ideal që t’i kryejë disa punë në interesin e saj.
“Të bëjë një pazar me Serbinë rreth njohjes, të kërkoj nga shtetet aleate që t’i bëjnë më shumë presion vendeve të BE-së që nuk e kanë njohur Kosovën që ta njohin tani dhe të kërkoj anëtarësimin në Këshillin e Evropës. Po ashtu t’i përshpejtojnë hapat drejt NATO-s dhe BE-së”, theksoi Spahiu.
Ndryshe, presidentja e shtetit, Osmani-Sadriu këto ditë i ka shkruar një letër presidentit amerikan Joe Biden për të ndihmuar Kosovën në përpjekjet e saj për anëtarësim në NATO. /InLajmi/
