Zëvendësministri Ministrisë së Planifikimit dhe Industrisë, Hysen Durmishi ka mbajtur një konferencë të përbashkët për media së bashku me përfaqësues të transportuesve, derisa është marrë vendim që të rikthehen çmimet e mëhershme të biletave të autobusit për disa kategori, raporton InLajmi.
Në vendimin e MPHI-së, thuhet se pas rritjes së çmimeve të biletave, disa kategori të qytetarëve, siç janë studentët, personat me nevoja të veçanta, pensionistët si dhe për invalidët e luftës t’u zbritet çmimi i biletave për 50%.
Por që të 2 palët kanë rënë dakord që çmimet për këto kategori të kthehen në gjendjen në të cilën kanë qenë para rritjes, ndërkohë Shoqata e Transportuesve Rrugor do ta largojnë edhe padinë ndaj këtij dikasteri.
“Për shkak të rritjes së çmimeve te naftës dhe derivateve kompanitë e transportit rrugor në disa raste kanë vendos t’i rrisin çmimet e biletës. Dhe ne si ministri patëm marr vendim t’i mbrojmë disa kategori. Pas diskutimeve që kemi pas kemi ardhur në një dakordim dhe kemi arrit në një marrëveshje që çmimet për këto kategori të kthehen në gjendjen në të cilën kanë qenë para rritjes. Për këto kategori shoqërore kryetari dhe anëtaret e shoqatës janë zotu që do t’i mbrojnë këto kategori. Pra këta kanë dërguar edhe padi por do ta tërheqin edhe padinë. Ne sivjet kemi edhe në plotësim ndryshimin e Ligjit për transportin edhe udhëzimet administrative”, tha ai.
Tutje, Durmishi tha se janë duke bashkëpunuar që ta bëjmë ligjin sa më të mirë dhe të përdorshëm.
“Qëllimi që transporti rrugorë është që të funksionoj në mënyrë sa më të mirë. Jemi të gatshëm që të bashkëpunojmë që të bëjmë zgjidhje sa më të mirë për qytetarët por mos të ballafaqohen me probleme as transportuesit”, ka theksuar Durmishi./InLajmi/
