Presidentja e Kosovës, Vjosa Osmani ka komentuar situatën e luftës në Ukrainë dhe mbështetjen që Kosova e ka dhënë ndaj popullit ukrainas.
Osmani tha se ajo çfarë bota po sheh në Ukrainë është pikërisht ajo se çfarë populli i Kosovës ka parë dhe përjetuar në vitin 1998-99.
“Ajo çfarë po shohim është pikërisht ajo se çfarë kemi përjetuar në vitin 1998-99 kur Kosova dhe populli i saj kanë qenë viktima të gjenocidit, krimeve të luftës dhe krimeve kundër njerëzimit. Dhe, fatkeqësisht kjo situatë nuk po përmirësohet”, është shprehur Osmani.
E para e shtetit tha se Kosova jo vetëm që u solidarizua me Ukrainën, por u bë edhe shteti i parë në rajon që iu bashkua sanksioneve të BE-së dhe SHBA-së karshi Rusisë, teksa përmendi edhe gatishmërinë për të strehuar dhe ndihmuar refugjatët dhe gazetarët ukrainas.
Tutje, Osmani tha se përderisa Serbia ka zgjedhur që të qëndrojë me Rusinë duke mos i vënë sanksione, mund të ketë përpjekje që t’i vazhdojë politikat e saja hegjemonike që ndërlidhen me “Serbinë e Madhe”.
“Kjo është duke reflektuar kërcenim tek ne në 2 aspekte. E para është se ka shqetësim në rritje në rajonin tonë se Rusia mund të përpiqet që të nxitë tensione dhe konflikte në regjionin tonë dhe ta shpërqendrojë vëmendjen e NATO-s dhe komunitetit ndërkombëtarë përderisa lufta në Ukrainë është duke vazhduar”, tha ajo për mediumin britanik “Chanel 4 News”.
“Dhe së 2-ti mund ketë përpjekje nga Serbia si aleati kryesor dhe përfaqësuesja e vetme e Rusisë në rajon që ta vazhdojnë tutje me politikat e tyre hegjemonike që ndërlidhen me nocionin e Serbisë së Madhe”, ka thënë Osmani, transmeton Klankosova.tv.
Ajo tha se presidenti serb, Aleksandar Vuçiq është duke luajtur sipas rregullave të “librit të Putinit”.
