Deputeti i Aleancës për Ardhmërinë e Kosovës (AAK) Pal Lekaj ka thënë se lufta në Ukrainë ka ndikuar edhe në ekonominë e vendit, duke shkaktuar krizë për qytetarët
Në një intervistë për Ekonomia Online deputeti Lekaj tha se Qeveria Kurti është në gjumë dimëror, në vend se të marrë masa për subvencionimin e artikujve ushqimor.
Prandaj ai thotë se Qeveria urgjentisht duhet marrë masa sa i përket politikave fiskale.
“Sa i përket invazionit rus në Ukrainë mendoj që ka ndikuar mjaft edhe në ekonominë e Kosovës meqë kemi pasur importet nga shteti ukrainas sidomos në drithëra dhe derivate të naftës dhe kjo ka ndikuar dukshëm edhe në ngritjen e çmimeve. Qeveria po duket që është në gjumin dimëror dhe fare nuk ka marrë masa për subvencionimin”.
“Do të ketë ndikim mjaft të madh në ekonominë e vendit dhe mendoj që Qeveria duhet që urgjentisht të marrë masa në politikat fiskale e sidomos në pako për subvencionim të artikujve bazik ushqimor”,tha ai.
Kur foli për situatën politike Lekaj theksoi se Serbia mund t’i mbajë zgjedhjet duke u bazuar në ligjet e Kosovës.
“Qëndrimi i AAK-së është të bazohet në ligjet e Kosovës. Së pari Serbia duhet ta njohë realitetin e ri dhe të kërkojë që zgjedhjet të mbahen sipas ligjeve të Kosovës dhe në asnjë mënyrë tjetër”.
“Prandaj AAK-ja do të mbështes Qeverinë sikurse për referendum nëse ka qëndrim të njëjtë. Është e lejuar të mbahen zgjedhjet në bazë të ligjeve të Kosovës nëpër ambasada por së pari Serbia duhet ta njohë Kosovën si shtet”, tha Lekaj.
