Përfaqësuesi i Lartë i BE-së për Punët e Jashtme dhe Politikën e Sigurisë, Josep Borrell ka thënë se është i zhgënjyer me ecurinë e dialogut Kosovë-Serbi.
Borrell ka thënë se dialogu nuk po ecën me ritmin e duhur përkundër faktit se siç ka thënë ai ka caktuar një nga diplomatët më të mirë në këtë detyrë.
“Nuk po ecën. Unë jam i ngarkuar me këtë dialog dhe nuk po ecën. Të paktën nuk po ecën me ritmin që duhet të ecte. Bashkimi Evropian ka një mandat nga Kombet e Bashkuara për të koordinuar, shtyrë dhe aktivizuar këtë dialog. Unë kam caktuar një nga diplomatët më të mirë për këtë detyrë, dhe duhet të them që duhet bërë më shumë, duhet më shumë punë. Duhet të shtyjmë të 2 palët me qëllim që të kuptojnë se ka vetëm një zgjidhje për problemin dhe se ajo vjen përmes dialogut, duke e ditur ama që nuk do të jetë e lehtë”,tha Borell.
E kjo sipas tij është çështje shumë e komplikuar. Ju e dini sa e vështirë dhe e komplikuar ka qenë historia e Ballkanit gjatë 20 apo 30 viteve të shkuara.
“Por e vetmja zgjidhje e këtij problemi është dialogu, dhe unë këtë po nxis, por jam i zhgënjyer që nuk po ecim me ritmin që kërkon problemi, sepse perspektiva evropiane e të 2 vendeve po mbizotërohet plotësisht nga rezultati i këtij dialogu”, është shprehur Borrell në një intervistë për DW
Borrell po qëndron për vizitë në Ballkanin Perëndimor.
