Bisedimet për paqe midis Rusisë dhe Ukrainës janë në zhvillim e sipër, tha negociatori ukrainas, Mihailo Podolyak.
Pa dhënë shumë detaje, ai përmendi “armëpushimin” dhe “tërheqjen e trupave” ruse nga territori i Ukrainës – me sa duket – si kërkesa të Ukrainës.
Palët kanë zhvilluar dje edhe një rund negociatash, por e kanë ndërprerë për, siç kanë thënë, çështje teknike.
Të 2-ja delegacionet kanë dhënë shenja për përparim në bisedime, por, deri më tash, nuk ka diçka konkrete.
Ndryshe takimi i sotëm është i 4 me radhë nga delegacioni ukrainas dhe ai rus që nga fillimi i luftimeve.
Sot është dita e 20-të me radhë që nga koha kur filloi agresioni rus në Ukrainë.
Si pasojë e sulmeve të shumta bombarduese shumë civilë dhe ushtarakë humbën jetën.
Poashtu mbi 2 milionë njerëz raportohet të jenë larguar nga Ukraina.
Të njëjtit kanë marrë rrugë për në vendet fqinje të Ukrainës, por edhe më larg.
Në Ukrainë sot kanë udhëtuar edhe tre kryeministra të vendeve evropiane, për të diskutuar me presidentin ukrainas, Volodymyr Zelensky lidhur me situatën tragjike atje, transmeton lajmi.net.
Ndërsa Bashkimi Evropian sot mori vendim edhe për një sërë sanksione të reja ndaj Rusisë.
