Pas më shumë se 2 vitesh do të rikthehet njëri nga eventet më të bukura në vend “Ballo Shqiptare”, shkruan InLajmi.
“Ballo Shqiptare” do të mbahet me 19 mars, ndërsa vlen të theksohet se këtë vit do të mbahet për të 6-ën herë prej se është themeluar.
2 ikonat e bukurisë, Diellza Kolgeci dhe Afërdita Paqarada do të jenë sërish prapa kësaj ngjarjeje të madhe kulturore.
Diellza Kolgeci, për Gazetën InLajmi ka shpalosur disa detaje me rëndësi, derisa ka treguar edhe arsyen se përse kësaj radhe ky event po mbahet në muajin mars dhe jo nëntor siç është mbajtur herët e tjera.
“Do të mbahet në muajin mars kësaj radhe sepse është muaj që shënon shumë data historike për popullin tonë. “Ballo Shqiptare” pati filluar vitet e tjera në muajin nëntor për hir të Ditës së Flamurit, ndërsa këtë vit do të mbahet edhe një program për ata që dhanë shumë për këtë shtet”, ka theksuar Kolgeci për Gazetën InLajmi.
Më tej, Kolgeci, tha se në programin që do të mbahet në “Ballo Shqiptare” do të prezantohen veshje të ndryshme e të bukura tradicionale.
“Sivjet përpos ansambleve të udhëhequra nga Dilaver Kryeziu me valle të bukura do të kemi edhe të ftuar nga Baleti Kombëtar si dhe plot risi të tjera”, tha Kolgeci.
Ndryshe, nga të ftuarit kërkohet që të respektohet kodi i veshjes me detaje nga veshjet tradicionale kombëtare. /InLajmi/
