Inspektorati Policorë ka nisur këtë të hënë operacionin e koduar me emrin “Pika” dhe po e vazhdon ende në rajonin e Gjakovës dhe Prizrenit, gjegjësisht në pikat kufitare Qafë Morinë dhe Qafë Prushë, ndaj disa zyrtarëve policorë dhe doganorë, nën dyshimin për përfshirje në vepra penale, përcjell InLajmi.
Ky aksion siç ka njoftuar këtë të hënë Inspektorati Policorë po bëhet në bashkëpunim me Prokurorinë Speciale dhe Agjencinë e Kosovës për Inteligjencë si dhe Doganës së Kosovës.
Operacionit të sotëm i ka paraprirë një hetim rreth një vjeçar nga ana e Inspektoratit ku një numër i zyrtarëve policorë dhe doganorë dyshohen për veprat penale “marrje e ryshfetit” dhe “keqpërdorim i pozitës apo autoritetit zyrtar.
Tutje, Inspektorati ka njoftuar se në këtë aksion pritet që fillimisht të shoqërohen e pastaj të arrestohen dhjetëra zyrtarë policorë.
Ndryshe, lidhur me këtë aksion ka reaguar ministri i Punëve të Brendshme, Xhelal Sveçla, i cili ka thënë se Policia e Kosovës asnjëherë më nuk do të jetë vendi ku thyhet Ligji. /InLajmi/
