Zëvendësministri i Punëve të Jashtme dhe Diasporës, Kreshnik Ahmeti, ka bërë të ditur se ka zhvilluar një telefonatë me homologen e tij, Emine Dzhaparova, përcjell InLajmi.
Siç njofton Ahmeti në takim u bisedua për mbështetjen e Kosovës ndaj Ukrainës pas agresionit rus.
Ahmeti ka thënë se gjithashtu ka përmendur edhe sanksionet e Kosovës të vendosura kundër Rusisë duke theksuar se ato mund të shtohen në koordinim me SHBA-të dhe BE-në.
Mes tjerash, Ahemti tha se Dzhaparova e falënderoi Kosovën për këtë mbështetje si dhe e ka njoftuar për situatën e rëndë atje dhe për rezistencën e ukrainasve.
Postimi i plotë i tij:
Sot kisha një telefonatë me homologen e time ukrainase, Dzhaparova.
Atë e njoftova për rreshtimin e Republikës së Kosovës në përkrahje të pavarësisë, sovranitetit dhe integritetit territorial të Ukrainës. Përmenda sanksionet të cilat Kosova tashmë i ka vendosur dhe gatishmërinë tonë për t’i shtuar ato në koordinim me SHBA-të, BE-në dhe partnerët e tjerë ndërkombëtare. Gjithashtu, e njoftova edhe për ndihmën që Republika e Kosovës po e ofron në këtë situatë duke strehuar 20 gazetarë, duke larguar përkohësisht regjimin e vizave për qytetarët ukrainas dhe duke treguar gatishmëri për strehimin e 5000 refugjatëve.
Dzhaparova e falenderoi Republikën e Kosovës për mbështetjen dhe për rreshtimin e menjëhershëm në anën e Ukrainës. Nga Ukraina ajo më njoftoi për situatën e rëndë humanitare të shkaktuar nga agresioni ushtarak i Federatës Ruse dhe për rezistencën e fortë që po e bëjnë ukrainasit. Kriza humanitare e shkaktuar nga Federata Ruse, veçanërisht në qytete si Mariupol ku qytetarët po mbahen peng nga rrethimi rus, po thellohet çdo ditë e më shumë.
Asaj i përcjella ngushëllimet e sinqerta të Qeverisë së Republikës së Kosovës për viktimat e agresionit rus dhe të 2 u pajtuam që t’i vazhdojnë komunikimet e rregullta për bashkëpunim të mëtutjeshëm./InLajmi/
