Stafi në termocentralin bërthamor të Çernobilit të Ukrainës nuk po kryen më disa detyra për shkak të “lodhjes fizike dhe mendore”, thotë mbikëqyrësi bërthamor i OKB-së, transmeton InLajmi.
Në një postim në Twitter, Agjencia Ndërkombëtare e Energjisë Atomike (IAEA) tha se stafi në termocentral kishte punuar pa ndërprerje për gati 3 javë.
Forcat ruse kapën termocentralin bërthamor, vendin e fatkeqësisë më të madhe bërthamore në botë, në ditën e parë të pushtimit.
Për më tepër, drejtori i përgjithshëm i IAEA Rafael Grossi tha se situata është gjithnjë e më e rëndë, me të cilën po përballet stafi i Çernobilit, shkruan BBC.
Autoritetet kanë shprehur shqetësimin për pasojat e mundshme të dëmtimit të objekteve bërthamore të Ukrainës gjatë luftimeve. /InLajmi/
