Kryetari i Shoqatës së Transportuesve, Ruzhdi Kurtishaj, këtë të diele në një takim urgjent me operatorët, ka folur në lidhje me vendimin e marrë për uljen e çmimeve për biletat e transportit ndërurban për autobusë për disa kategori, përcjell InLajmi.
Kurtishaj ka thënë se ata kërkojnë që qeveria ta anuloj brenda 72 orësh vendimin e marrur për lirimin e çmimeve të biletave.
“Kemi marrë 3 vendime. E para ka të bëjë me masën e përkohshme, pra Këshilli Drejtues me anë të një kërkesë-padie, do t’i drejtohet Gjykatës Themelore në Prishtinë dhe Gjykatës Kushtetuese për shkeljet ligjore dhe për mohimin e të drejtave tona si treg i lirë. Vendimi i 2-të ka të bëjë me çështjen që ne po kërkojmë që brenda 72 orësh qeveria ta anulojë këtë vendim, ne presim reflektimin e Qeverisë, anulimin e vendimit në afat prej 72-orësh dhe të ulet këtu në Odën Ekonomike bashkë me Shoqatën dhe të zbatojnë marrëveshjen e shkruar mes qeverisë dhe shoqatës për subvencionim të transportit rrugo”, tha ai.
Tutje Kurtishaj ka shtuar se nëse qeveria nuk e aprovon, do të organizohen protesta.
“Nëse kjo nuk aprovohet, atëherë vendimi i 3-të pason që të organizohet protesta apo të vazhdohet protesta sepse e tham që protesta është e pezulluar dhe do të vazhdojë deri në realizimin e kërkesave tona”, tha Kurtishaj.
Zëvendësministri i Infrastrukturës, Hysen Durmishi, të shtunën ka njoftuar se është marrë vendim për uljen e çmimeve për biletat e transportit ndërurban për autobusë për disa kategori.
“Duke pasur parasysh lëvizjet e çmimeve këtyre ditëve dhe në përputhje me kompetencat tona, kemi marrë vendim që të ndikojmë direkt në uljen e këtyre çmimeve për kategoritët që prek më shumë kjo gjendje, duke përcaktuar kështu çmimoren për transportin ndërurban me autobus për fëmijët, studentët, invdalidët e luftës, invalidët e punës dhe pensionistët. Për kategoritë e lartpërmendura, me këtë vendim përgjysmohet çmimi i biletës aktuale”, ka njoftuar Durmishi./InLajmi/
