Këto ditë është përmendur ideja e transferimit të aeroplanëve të Polonisë për Ukrainë, e që si vend i mundshëm transferimi po përmendet Kosova, shkruan InLajmi.
Lidhur me këtë së fundmi nga Qeveria e Kosovës janë deklaruar se nuk kanë marrë një shkresë zyrtare lidhur me këtë.
E sipas këtij skenari është thënë që avionët do të mund të fluturojnë drejt një vendi jo-anëtar të NATO-së apo që nuk është anëtar i BE-së.
Më pas pilotët e Ukrainës nga ai vend mund t’i dërgojnë aeroplanët drejt Ukrainës.
Lidhur me këtë në një prononcim për Gazetën InLajmi, Avni Islami, ekspert i çështjeve të sigurisë tha se nuk e sheh aspak shqetësuese, kalimin e aeroplanëve të Polonisë përmes Kosovës për në Ukrainë.
“Ideja është që avionët luftarakë që dëshiron t’ia dhurojë Polonia Ukrainës. Pra Polonia ata avionë t’i dhurojë, mandej do t’i kompensojnë me avionë ushtarakë E16 nga SHBA. Shkëmbim tepër i mirë ushtarak e humanitar për Ukrainën, por edhe të njëjtën kohë do ta freskojë flotën e vet ajrore Polonia. E shumë vende e kanë refuzuar por edhe ideja e Polonisë është e kufizuar nga SHBA pasi që asnjë vend i Aleancës apo NATO-s nuk përdoret si vend ku mund të furnizohet Ukraina me aeroplanë”,tha Islami.
E sipas tij arsyeja pse është përmendur Kosova është për shkak se është një vend neutral.
“Është menduar që të jetë një vend neutral pra që nuk është pjesë e Aleancës Atlantike dhe është menduar që Kosova mund të jetë ky vend. Kryeministri e tha dje se nuk e kanë marrë asnjë kërkesë deri më tash. Por unë mendoj se edhe nëse do t’i bëhej kjo kërkesë Kosovës, mendoj se është një mundësi e mirë që edhe vendi jonë të kontribuoj për Ukrainën dhe t’i lejohet hapësira ajrore dhe pista avionëve ushtarakë të fluturojnë dhe të shkojnë në Ukrainë,”ka deklaruar Islami.
Por sa mund të paraqet kjo rrezik për vendin tonë, Islami ka dhënë këtë përgjigje.
“Pasojat mund të priten çdoherë nga Serbia dhe Rusia të cilat kanë plane të veçanta dhe janë të interesuara të shkaktojnë frikë dhe pasiguri dhe diçka më të madhe por deri më tash nuk ka indikacione të tilla dhe mendoj se Kosova nuk do të bënte keq që ta lejonte kalimin tranzit të avionëve për Ukrainë. Madje me këtë do të tregonte se është një vend i cili është rreshtuar përkrah vendeve të perëndimit të cilat e duan lirinë dhe kësisoj asnjë rrezik nuk mund të paraqes kjo”,tha më tej Islami.
Ndërkohë, eksperti i çështjes së sigurisë më tej ka ritheksuar faktin se Kosova duhet të jetë e gatshme në çdo moment për çdo rast, pasi që pasojat mund të priten çdoherë nga Serbia dhe Rusia pasi që sipas tij këto 2 vende kanë plane të veçanta dhe janë të interesuara të shkaktojnë frikë .
“Sovranitetin e Kosovës e garanton KFOR-i dhe eventualisht çdo sulm në një milimetër të Kosovës do duhej të konsiderohej sulm ndaj Aleancës Atlantike e cila e ruan paqen në vendin tonë”,tha tutje ai./InLajmi/