Ushtarët rusë vazhdojnë të rrethojnë Kievin, banorët nga ana tjetër përpiqen të arratisen në orët e armëpushimit.
Moska këmbëngul se do të hapë korridoret humanitare, por presidenti i Ukrainës Volodomyr Zelensky e cilëson këtë ofertë një kurth. Në qytete si Mariupol, situata është e trishtueshme.
“Mariupol dhe Volnovakha mbeten plotësisht të bllokuara. Edhe pse ne bëmë gjithçka që ishte e nevojshme për të funksionuar korridorin humanitar, trupat ruse nuk e ndalën sulmin. Pavarësisht kësaj, vendosa të dërgoj një kolonë kamionësh në Mariupol me ushqim, ujë, ilaçe”, u shpreh Volodymyr Zelensky, president i Ukrainës.
Bombardimet e rënda mbi qytetin e Mariupolit kanë shkatërruar ndërtesa sikundër ky spital. Moska thotë se ishte një sulm “i inskenuar” dhe mohon çdo përgjegjësi.
SHBA sheh gjurmë të krimeve të luftës.
“Ne absolutisht, jemi mbështetës të përpjekjeve për të dokumentuar dhe për të hetuar raportet e krimeve të mundshme të luftës në Ukrainë. Fakti është se ne kemi parë raporte shumë të besueshme të sulmeve të qëllimshme ndaj civilëve, të cilat, sipas Konventat e Gjenevës, përbëjnë krime lufte”, u shpreh Ned Price, zëdhënës i Departamentit Amerikan të Shtetit, transmeton Euronews.al.
Më shumë se 2 milionë ukrainas janë larguar nga vendi që nga fillimi i pushtimit. Rreth 2/3 e tyre kanë shkuar në Poloni.
