Çdo ditë qytetarja Liridona H, detyrohet që djalin dhe vajzën e saj, njëri në klasë të 3-të dhe tjetri në klasë të parë t’i dërgojë në shkollë dhe t’ua mbaj çantat, pasi që janë shumë të rënda dhe nuk po munden t’i mbajnë vet ata, shkruan InLajmi.
“Që 3 vjet kështu e kam përditshmërinë, më duhet t’i dërgoj dhe t’i marrë 2 fëmijët e mi. Pra, me ua dërgu çantat sepse nuk po munden vetë se shumë të rënda. Mendoj se duhet shkollat të bëjnë një zgjidhje sepse kjo përnjëmend është shqetësuese, pasi që më vonë mendoj se do të ndikoj në shëndetin e tyre, pesha e rëndë e çantave”,tha prindja, Liridona.
E si kjo prinde ka edhe shumë familjarë të tjerë në Kosovë të cilët obligohen që për shkak të peshës së çantave shkollore, fëmijët e tyre t’i dërgojnë çdo ditë në shkollë.
Lidhur me shqetësimet e prindërve për çantat e rënda të nxënësve pajtohet edhe Xhavit Berisha, drejtori i shkollës fillore “Xhavit Ahmeti” në kryeqytet.
“Shqetësimet e prindërve janë të vazhdueshme, shqetësime këto edhe tonat. I kemi disa dollapë nëpër klasa por kanë filluar të amortizohen. Klasat e nxënësve, 1-5 i shfrytëzojnë edhe nxënësit e klasave, 6-9 para dreke, pra, janë klasë të përbashkëta. Edhe kjo po na shkakton probleme për arsye se dollapët nuk mbyllen me çelës”,tha drejtori Berisha.
I pyetur se a e kanë adresuar këtë problem deri më tash dhe cila është përgjigjja që e kanë marrë nga komuna e Prishtinës, ai dha këtë përgjigje.
“Thënë të drejtën deri vonë Drejtoria Komunale e Arsimit nuk është konsoliduar pas zgjedhjeve, rrjedhimisht edhe nuk i kemi adresuar”,tha ai.
E nga Komuna e Prishtinës lidhur me këtë shqetësim i kanë thënë Gazetës InLajmi se në buxhetin e miratuar nga qeverisja e kaluar nuk ka asnjë planifikim për vendosje të dollapëve në të gjitha shkollat e Prishtinës.
“Në buxhetin që do të draftohet në qershor të këtij viti do ta procedojmë si projekt të veçantë furnizimin me dollapë të të gjitha institucioneve edukative arsimore”,thuhet në përgjigjen e Komunës.
Në anën tjetër Iliriana Pylla, nga Ministria e Arsimit për Gazetën InLajmi tha se është duke u punuar intensivisht në draft ligjin për rishikimin e teksteve shkollore.
“Jemi duke i adresuar të gjitha problemet që lidhen me tekste shkollore në të cilat po punojnë jo vetëm zyrtarë të MASHTI -it por edhe organizata që ne bashkëpunojmë. Nuk janë procese të lehta dhe që mund të ndryshohen shumë shpejt, sepse janë probleme të shtersuara vit pas viti dhe zgjidhja duhet të jetë e sigurtë. Por, ekspertët e fushës janë duke u marrë me studime dhe të gjitha vërejtjet, sugjerimet e ndryshimet do të adresohen”,tha Pylla.
E Rinor Qehaja nga Instituti EdGuard tha për Gazetën InLajmi se nga hulumtimet që kanë bërë në shkolla sa i përket çantave të rënda të fëmijëve kanë dalë me konkluzion se pesha e çantave tek fëmijët e ciklit të ulët tejkalon kufizimin e këshillueshëm prej 10%.
“Nga hulumtimi i Institutit EdGuard të para disa vitesh rezulton që pesha e çantave tek fëmijët të ciklit të ulët tejkalon kufizimin e këshillueshëm prej 10% të peshës së trupit dhe kjo është shqetësuese. Veçanërisht kur dihet grup mosha e fëmijëve. Pesha e çantës mund të shkaktoj dhembje momentale dhe lodhje tek fëmijët, për rrjedhojë edhe shpërqendrimin e tyre gjatë procesit mësimor. Fatmirësisht pesha e çantave nuk ka ndonjë ndikim afatgjatë në shëndetin e fëmijëve”,tha ai.
Në anën tjetër psikologu, Arbër Zeka për Gazetën InLajmi tha se përveç lodhjes çantat e rënda mund të shkaktojnë edhe probleme psikologjike .
“Çantat e shkollës së fëmijëve janë aq të rënda sa që ndikojnë jo vetëm në shëndetin fizik të fëmijës, por edhe në atë mendor duke mos i ndarë këto 2 ndërmjet vete si psikologë. Pesha e çantës është rreth 6 kilogramë, paramendoni se si do të ecnin fëmijët, duke ngritur një çantë kaq të rëndë, si do të ngjitet fëmija shkallëve”,tha Zeka.
Psikologu Zeka më tej tha se në një situatë të tillë sigurisht fëmijët përballen me dhimbje shpine dhe probleme muskulore dhe dhimbje të qafës.
“Kockat e fëmijëve janë të buta para moshës 18 vjet, derisa deri në këtë moshë, palca kurrizore nuk është aq e fortë sa të përballojë kaq shumë peshë. Sipas disa studimeve kemi mësuar se 60% e fëmijëve në shkollë kanë dhimbje në kyçe, 30% e fëmijëve vuajnë nga dhimbje gjoksi dhe 58% e fëmijëve vuajnë nga sëmundje e zemrës. Pesha e çantës së fëmijës nuk duhet të kalojë 10% të peshës së saj”,tha më tej psikologu Zeka.
E ortopedi Gentian Morina, për Gazetën InLajmi ka folur lidhur me problemet që mund t’i sjellin çantat e rënda tek fëmijët.
“Mundet edhe me sjellë pasoja çanta e rëndë te fëmijët. Por sa mund të sjell nuk mund të themi. Ndoshta prej 30 nxënësve, njëri mund të ketë problem me shpinë nga çanta e rëndë. Shkaku i peshave të rënda, fëmijët mund të kenë probleme edhe më vonë”,tha ortopedi Morina.
Lindita Canolli –Fejzullahu /InLajmi/
