Kombet e Bashkuara dhe Organizata Botërore e Shëndetësisë po bëjnë thirrje për ndalimin e menjëhershëm të sulmeve ndaj objekteve të kujdesit shëndetësor, spitaleve, punonjësve të kujdesit shëndetësor dhe ambulancave në Ukrainë.
“Asnjë nga këto nuk duhet të jetë kurrë, kurrë një objektiv”, tha zëdhënësi i OKB-së, Stephane Dujarric, në konferencën e tij të përditshme për shtyp.
Dujarric tha se OKB-ja po ndiqte urgjentisht detajet e sulmit “tronditës” të raportuar në një spital për fëmijë dhe maternitet në qytetin Mariupol nga forcat ruse. Të paktën 17 të lënduar janë raportuar, shkruan BBC.
Organizata Botërore e Shëndetësisë ka verifikuar deri më tani të paktën 18 sulme të ndryshme në objektet shëndetësore që nga fillimi i pushtimit rus të Ukrainës, transmeton Alsat.Mk.
Në raport thuhet se këto sulme kanë shkaktuar të paktën 10 viktima dhe 16 të plagosur.
