Presidenti francez, Emmanuel Macron tha të enjten se kushtet e vendosura nga presidenti rus Vladimir Putin për një armëpushim në Ukrainë “nuk janë të pranueshme për askënd”, transmeton InLajmi.
“Unë nuk shoh një zgjidhje diplomatike në orët e ardhshme apo edhe ditët në vijim,” u tha Macron gazetarëve në Versajë.
Macron tha se nuk e sheh armëpushimin në Ukrainë si realist në orët e ardhshme.
“Unë jam padyshim optimist, por duhet të jem edhe realist”, shtoi ai.
Putin zhvilloi një bisedë telefonike me Macron dhe kancelarin gjerman Olaf Scholz.
Duke folur për kërkesën e Ukrainës për një pranim të shpejtë në BE, Macron u tha gazetarëve: “Me një vend në luftë? Nuk mendoj kështu… A duhet ta mbyllim derën dhe të themi “kurrë”? Kjo do të ishte e padrejtë.”
Presidenti francez tha se lufta në Ukrainë është një “tragjedi … një tragjedi njerëzore, politike dhe humanitare”, shkruan CNN.
Udhëheqësi francez tha se ishte i shqetësuar duke parë imazhet nga sulmi vdekjeprurës me bombë në një maternitet në Mariupol në Ukrainën jugore të mërkurën. /InLajmi/
