Ministri i Energjisë i Ukrainës, Herman Halushenko tha se vendi po bën “çdo gjë të mundshme” për të rivendosur furnizimin me energji elektrike në termocentralin bërthamor të Çernobilit sa më shpejt të jetë e mundur, transmeton InLajmi.
Ministri i Energjisë theksoi se energjia elektrike nevojitet për të ruajtur mekanizmat e ftohjes në depon e karburantit bërthamor të përdorur.
Ministri shpjegoi se ka disa linja elektrike për termocentralin, ku e fundit është shkatërruar si pasojë e granatimeve të okupatorit të mërkurën.
Agjencia Ndërkombëtare e Energjisë Atomike (IAEA) tha se ishte informuar nga Ukraina se Çernobili kishte humbur energjinë, por se ajo nuk kishte asnjë ndikim në sigurinë e termocentralit.
“Për hir të sigurisë së Ukrainës ose Evropës, dhe për të gjithë botën, ushtria ruse duhet të largohet nga objektet bërthamore”, tha Halushenko.
“Terrorizmi bërthamor nuk është vetëm kur synohen termocentralet bërthamore. Është kur stafi është nën presion të madh dhe një gabim i vetëm mund të ketë pasoja të mëdha”, paralajmëroi Halushenko, shkruan CNN.
Ministri falënderoi stafin në termocentralet e Çernobilit dhe Zhaporizhzhisë për punën e tyre heroike. /InLajmi/
