Ministrja e Industrisë, Ndërmarrësisë dhe Tregtisë, Rozeta Hajdari, në një konferencë të përbashkët me kryeministrin e vendit Albin Kurti këtë të enjte ka konfirmuar se ka mungesë të inspektorëve të tregut dhe se po shohin mundësitë që të shtohet numri i tyre, raporton InLajmi.
“Ka mungesë të inspektorëve për disa sektorë, por siç e dini prej zgjedhjeve të fundit e kemi synimin si qeveri për rritjen e numrit të inspektorëve. Kemi shtuar numrin e inspektorëve në AVUK për shkak të gjendjes me pandeminë dhe do të shikojmë mundësinë për rritjen e numrit të inspektorëve të tregut. Kemi shtyrë përpara Ligjin për Inspektimin i cili do të bëjë një reformë të tërësishme në inspektimet në Kosovë. Do të kemi rishikim të të gjithë ligjeve dhe akteve nënligjore në muajt në vijim”.
Ajo është zotuar se do të bëhen më shumë inspektime në të ardhmen si dhe theksoi se numri i inpektorëve do të rritet.
“Do të mirëfunksionojmë tregun me sa shumë inspektime në të ardhmen, edhe me rritjen e numrit të inspektorëve dhe me ngritjen e platformave digjitale për inspektime që do të koordinohen përmes një inspektori të përgjithshëm në Zyrën e Kryeministrit”, tha ajo pas vizitës në një fabrikë të vajit në Gjilan./InLajmi/
