Shefi i Grupit Parlamentarë të AAK-së, Besnik Tahiri përmes një konference për media ka reaguar lidhur me rritjen e madhe të çmimeve, derisa tha se Qeveria e Kosovës po heshtë karshi kësaj situate të jashtëzakonshme, raporton InLajmi
“Në vend se mu marrë me Ligjin e Pagave, po i rritin çmimet. Mbi të gjitha Qeveria s’po merr asnjë masë nga paralajmërimet që po i merr nga shoqatat e grurit. Shoqatat e grurit kanë njoftuar se çmimi i miellit mund të shkojë, pra 100 kilogramë do të kushtojnë 60 euro. Shteti duhet të veproj menjëherë, jo me ngulfat por të marr masat që i ka në dorë”,tha Tahiri.
Më tej, Tahiri kritikoi po ashtu Qeverinë e Kosovës që deri më tash nuk e ka dhënë as edhe një përgjigje lidhur me Ligjin e Pagave.
“Mos veprimi për Ligjin e Pagave është edhe një mashtrim i radhës që qeveria po ia bën zyrtarëve publik. Ligjin e Pagave ose le të tregojnë që nuk e kanë gati e nuk mund ta sjellin në mars, e në mungesë të saj ne kërkojmë me vendim, që zyrtarëve publik të ju bëhet një shtesë, pra shtesë prej 100 eurove”,tha Tahiri
Po, ashtu ai tregoi 5 kërkesat që i kanë për Qeverinë e Kosovës, të përfundojë Ligji i Pagave, përkohësisht të largohet akciza, të bëhet subvencionimi nga Ministria e Bujqësisë për prodhuesit, pra atyre që sigurojnë grurin dhe miellin, të bëhet me masa emergjente, ta organizojnë buxhetin, paga minimale, e cila është 170 euro, të merret vendimi i rritjes menjëherë.
“Pika e 5, është procedura në Gjykatën kushtetuese që ka të bëjë me energjinë elektrike. Lidhur me këtë vendim ne kemi reaguar shumë më herët”,tha ai. /InLajmi/
