Lufta në Ukrainë, debatet që po mbahen në vendin tonë për luftën, gjegjësisht rreziku që mund t’i kanoset veriut të vendit, por edhe rritja e çmimeve të produkteve bazë, përveç pandemisë po lë shumë pasoja sociale e psikologjike tek qytetarët, shkruan InLajmi.
Sociologia Bukurie Rrustemi, për Gazetën InLajmi tha se bota sapo doli nga pandemia e cila mori shumë jetë njerëzish dhe la pasoja tek shumë të tjerë, derisa situata në Ukrainë dhe rritja e çmimeve po e rëndon edhe më shumë jetën emocionale e sociale të qytetarëve.
“Bota sapo doli nga pandemia e cila mori shumë jetë njerëzish dhe tek shumë të tjerë la pasoja sociale e psikologjike, por edhe tek shumë të tjerë humbën vendet e punës. Në përgjithësi nga izolimi e mbyllja u shkaktuan dëme të mëdha në ekonominë botërore e sidomos në vendet e varfëra siç jemi ne ku varfëria u thellua dhe pasojat u rënduan”,tha ajo.
Me rritjen e çmimeve që po ndodhin për çdo ditë, Rrustemi ritheksoi se kjo po e rëndon jetën e qytetarëve në aspektin social dhe psikologjik të njerëzve.
“Tani të ndodhur përballë sfidës së re të Luftës Rusi-Ukrainë e cila po ndikon jashtëzakonisht shumë dhe shpejt në rritjen e çmimeve sidomos të produkteve bazë të ushqimit si miellit, vajit, sheqerit e sidomos naftës dhe gazit mund të themi që kjo gjendje po i sfidon edhe shtetet më të zhvilluara perëndimore. Natyrisht përballë kësaj situate jeta e qytetarëve tonë po rëndohet dita ditës dhe pothuajse po bëhet e pa përballueshme”,tha ajo për Gazetën InLajmi.
Nga frika se mund të mos ketë miell mjaftueshëm, vaj e produkte të tjera esenciale, qytetarët ia kanë ‘mësyrë’ dyqaneve duke blerë sasi të mëdha të këtyre produkteve ndërsa Rrustemi tha se kjo sjellë efekte anësore.
“Lufta është një gjendje e rëndë jo vetëm që ndikon në ekonomi, por godet rëndë aspektin social e psikologjik të njerëzve. Pasojat ekonomike edhe mund të riparohen por ato sociale e psikologjike vetëm mund të keqësohen. Edhe më e rëndë bëhet situata në vendin tonë për faktin se shumica dërmuese e shoqërisë sonë 2 dekada më parë ka përjetuar momente të ngjashme të luftës dhe terrorit”,tha ajo. /InLajmi/
