Rendi i qytetarëve për të blerë vaj, miell e sheqer ishte i gjatë në njërin nga spermarketet në Prishtinë, shkruan InLajmi.
Atmosfera që shihej në këtë supermarket, gjegjësisht teksa çdo i 2 person shihej me shumë thasë miell në shportën e gjësendeve të blera, e me nga një apo dhe 2 komplete me shishe vaj, dukej si kohë lufte, ku secili vraponte të sigurojë produktet bazike ushqimore.
Mielli, sheqeri, vaji, qumështi dhe kafja, janë vetëm disa nga produktet që kanë shënuar rritje të çmimit.
Disa nga qytetarët për Gazetën InLajmi, janë shfaqur të mllefosur me Qeverinë e Kosovës, që sipas tyre po lejon ‘‘bizneset“ të shfrytëzojnë këtë situatë, ashtu siç e shfrytëzuan pandeminë, duke i rritur çmimet sa po duan vetë.
‘‘Para 2-3 ditësh kanë qenë diku 30% më lirë vaji, mielli, por sot janë ndryshe çmimet. Qeveria është dashur të ketë rezerva diku për 8 muaj. Por, jo asgjë nuk po bën. Populli i ka zgjedhur qeveritarët t‘i sistemojë senet e jo veç me nejt. Nëse nuk mund të bëjnë asgjë, atëherë le ta lëshojnë rrugën edhe vinë të tjerët, ata që dine, që janë sprovuar në kohë kriza e lufte‘‘,tha qytetari Agim Sopi për Gazetën InLajmi.
Armend Spahiu, prishtinasi tjetër kishte mbushur shportën me miell e vaj e gjësende të tjera ndërsa për Gazetën InLajmi tha se ka mbetur pa fjalë nga çmimet e larta.
‘‘Para 2 ditësh vaji që e marrim ne ka qenë 1.40 e sot 1.90. Mielli më i liri ka qenë 12 sot ishte bë 14 euro, e ma i shtrenjti ishte bë 19 euro. Kjo me të vërtetë është tmerr, tmerr dhe s’di çka të them tjetër. Dikush duhet t’i ndalë bizneset sepse s’kanë të ndalur“,tha Spahiu.
Një qytetar tjetër, Enver Zeneli thotë se çmimet kishin ‘fluturu‘ ndërsa raftet thotë se janë zbrazë thujse krejt ku ka pasur miell.
‘‘Çdo kund çmimet e miellit edhe vajit ishin shtrenjtu. Edhe të tjerat sende ishin shtrenjtu po në theks të veçantë këto. Dikush më tha se nuk po gjendet miell në disa vende. Ose i kanë fshehur e i shesin pas pak ditësh me çmim më të lartë, nuk e di. E as nuk di si do t’ia dalim por ajo që e di është se ata që kanë toka bujqësore t‘i mbjellin që bile ta përafrojmë prodhimin e grurit deri diku me sa kërkohet”,tha Zeneli për Gazetën InLajmi.
E infermierja Ajshe Avdullahu thotë se dikush duhet t’i kontrolloj shtenjtimet dhe ‘zbrazjet e rafteve‘ në dyqane, gjegjësisht fshehjes së miellit e vajit.
‘‘ I bleva vetëm 5 shishe vaj sepse nuk jemi shumë anëtarë por vërehej shumë lehtë se kishin fluturu çmimet. Ishalla del dikush edhe i ndalë se kështu siç janë tu vepru bizneset po e godasin direkt atë që është më i dobët. Ishalla zoti na run, veç shiko sa njeri tu ble vaj e miell, taman si kohë luftë ku paniku zë vend te secili dhe vjen pyetja se a kemi me pasë mjaftueshëm miell dhe gjësende tjera të nevojshme“,tha ajo.
Ndryshe, gjatë ditës së sotme kryeministri i vendit, Albin Kurti ka thënë se ngritja e çmimeve në gjithë botën për produktet elementare është kostoja e mbrojtjes së lirisë së Ukrainës.
Qeveria e Kosovës gjatë ditës së sotme ka ndarë 50 milionë euro, subvencione për fermerët. Lindita Canolli Fejzullahi /InLajmi/
