Ministri i Shëndetësisë, Rifat Latifi, në komisionin për Shëndetësi, ka thënë se çështja më e rëndësishme në shëndetësinë kosovare ka qenë programi legjislativ i cili u miratua me 26 janar të këtij viti, raporton InLajmi.
Ministri Latifi tha se synojnë kthimin e trurit të mjekëve në Kosovë.
“Disa prej këtyre duhet ndryshime e plotësime. Kemi edhe 16 udhëzime e rregullore që do ta ndihmojnë shumë shëndetësinë e Kosovës. Shpesh keni dëgjuar për 7 shtyllat. Programi legjislativ, masat ligjore, kthimi i ekspertëve por edhe ruajtja e ekspertëve që i kemi brenda. Duhet të jemi kreativ me format që t’ua lehtësojmë kthimin. Shtylla e 3-të është Qendra Klinike të Ekselencës dhe Shërbime të avancuara. Shtylla e 4 janë kërkimet shkencore dhe krijimi i kapaciteteve hulumtuese në vendin tonë. Në fushën e mjekësisë jemi gati në fund të listës. Vitin 2019 kemi qenë në fund ndërsa në vitin 2020 nuk jemi në listë fare. E jashtëzakonshme është shpërndarja e hulumtuesve dhe shkencëtarëve”, tha Latifi.
Tutje ai ka thënë se do të krijojnë prcese të akreditimit në fushën e shëndetësisë.
“Ne duhet të krijojmë procese të akreditimit siç është ai i programeve të specializimeve, programeve publike dhe private, akreditimi i qendrave të ekselencës, kancerit të gjirit, onkologjisë e disa të tjera”, tha ai.
Latifi ndër të tjera ka thënë se Kosova ka shumë njerëz të mençur dhe se duhet të bisedohet për decentralizimin spitalor në vendin tonë.
“Numër 6 është përmirësimi i cilësisë dhe shpërndarja e auditorëve profesionistë. Dhe e fundit është se ne duhet me u ul bashkërisht dhe me bisedu për decentralizimin spitalor që e kemi. Është mirë me analizu procesin sepse kemi njerëz shumë të mençur në Kosovë dhe ndoshta na duhet edhe ekspert nga jashtë. Duhet me analizu se çka ka dalë mirë nga SHSKUK-ja”,tha Latifi./InLajmi/
