Kolektivi “Marshojmë s’festojmë” ashtu siç edhe ka paralajmëruar këtë të martë në Ditën e Gruas ka mbajtur marshin protestues me motot “Poshtë prokuroria patriarkale”, “Poshtë policia patriarkale”, “Prokuroria i ka duart me gjak”, raporton InLajmi.
Vlora Gashi nga kolektivi “Marshojmë s’festojmë”, ka akuzuar sistemin e drejtësisë në Kosovë për vrasjet e grave.
“Këtë 8 mars i denoncojmë si vetë fajtore të gjitha institucionet e drejtësisë për vrasjen e grave. Që nga viti 2010, 48 gra janë vrarë nga burrat në Kosovë. Janë pikërisht këto institucione të cilat dështuan t’i mbrojnë gratë edhe ato kur kërkuan ndihmë. Janë këto Gjykata e Prokurori, që vazhdojë t’i neglizhojnë gratë e t’i trajtojnë si qytetar të rendit të 2-të”,tha ajo.
Më tej Gashi tha se derisa policë e prokurorë që lirojnë burra dhunues edhe shumë gra të tjera do të përfundojnë të vrara nga burrat.
“Ne e dimë që përderisa ka gjykatës, prokurorë e institucione që besojnë se gratë meritojnë të ngacmohen, të përdhunohen, të rrihen a vriten, për neve nuk mund të ketë siguri e qetësi. Këtë 8 mars duam ta kthejmë vëmendjen te zinxhiri i kalbur patriarkal i drejtësisë, kjo pasi që këto institucione po i vrasin gratë njëherë duke mos i dalë në ndihmë sa janë gjallë e po i vrasin për së 2-ti duke i dhënë dënime të ulëta vrasësve. Ne sot kërkojmë llogari nga secili institucion veç e veç për të gjithë ato gra të vrara”,tha ajo
Marshi protestues ka nisur nga Pallati i Drejtësisë, për të vazhduar deri te objekti i Qeverisë së Kosovës./InLajmi/
