Kreu i PDK-së, Memli Krasniqi, ka uruar 8 Marsin të gjitha grave dhe vajzave të Kosovës, duke thënë se jemi krenarë me shumë gra e vajza të Kosovës, përcjell InLajmi.
Krasniwi ka thënë se ne si shoqëri duhet të reflektojmë mbi padrejtësitë ndaj vajzave dhe grave.
Tutje ai ka thënë se si parti janë krenarë që kanë një numër të madh të përfaqësueseve femra në pozita udhëheqëse nëpër komunat e Kosovës.
Postimi i plotë i tij:
Shoqëria jonë është krenare me shumë prej vajzave dhe grave të Kosovës, të cilat janë përfaqësimi më i mirë i shtetit dhe popullit tonë në botë, në fusha dhe lëmi të ndryshme. Por, kjo është vetëm njëra anë e realitetit, përderisa në përditshmëri, shumë vajza dhe gra në Kosovë vazhdojnë të jenë subjekt i diskriminimit, dhunës në familje dhe në pamundësi për qasje të barabartë në punë, arsim e zhvillim ekonomik.
Prandaj, në shënimin e Ditës Ndërkombëtare të Gruas, krahas festës, duhet zotuar dhe reflektuar thellësisht mbi padrejtësitë ndaj vajzave dhe grave, që paralelisht me njohjen e përpjekjeve të tyre të pa ndalura për më shumë barazi e të drejta, të bashkohemi me to në këtë përpjekje. Autonomia dhe të drejtat e barabarta të grave e vajzave nuk kanë alternativë.
Natyrisht, në këtë ditë, kujtojmë dhe nderojmë të gjitha nënat, motrat, gratë e vajzat kosovare të cilat mishërojnë sakrificën, përkushtimin e angazhimin jetik për çlirimin dhe ndërtimin e shtetit tonë.
Partia Demokratike e Kosovës është krenare që, sikur asnjëherë më parë, ka numrin më të madh të përfaqësueseve gra në pozita udhëheqëse nëpër komunat e Kosovës.
Pa dyshim, përpjekjet dhe rruga për një shtet i cili fuqizon edhe më tej gratë, nuk kanë mbaruar. Së bashku do të luftojmë çdo ditë, që Kosova të bëhet vend që mundëson fuqizimin politik, ekonomik dhe social të grave, që ato të marrin vendin e merituar në shoqëri. Gëzuar 8 Marsi, të gjitha grave dhe vajzave të Kosovës!/InLajmi/
