Kryeministri i vendit Albin Kurti dhe ministrja e Arsimit, Shkencës, Teknologjisë dhe Inovacionit, Arbërie Nagavci, këtë të hënë me rastin e 7 Marsit –Ditës së Mësuesit kanë vizituar shkollën fillore “Elena Gjika” në Prishtinë, raporton InLajmi.
Kryeministri Kurti tha se së bashku me Ministrinë e Arsimit do të jenë sa më afër mësimdhënësve t’i ndihmojnë dhe mbështesin ata .
“Kemi nevojë mbi të gjitha për arsim cilësor. Arsimi varet sa nga nxënësit, mësimdhënësit por edhe nga shteti. Nëse nëna është nëna e parë, mësuesja është nëna e 2-të. Andaj ne do të jemi bashkë me MASHT-in dhe Arbërie Nagavcin sa më pranë jush në mënyrë që të ju ndihmojmë dhe mbështesim edhe mësimdhënësit që t’i kenë kushtet e mira. Nëse nxënësit nëpër shkolla na dalin gjithnjë më të zot e të dijshëm atëherë e ardhmja jonë është shumë më e mirë”,tha Kurti, derisa tutje i uroi 7 marsin të gjithë mësimdhënësve duke iu premtuar mbështetje dhe përkrahje.
Ndërkohë Kurti foli edhe për rastet e vrasjeve të nxënësve në shkolla derisa theksoi se këto lajme do t’i kalojnë së kaluarës.
“Është vërtetë shqetësuese sepse bëhet fjalë për armë të ftohta të cilat po i mbajnë nxënësit nëpër shkolla, nxënësit e caktuar. Unë besojë që me angazhimin shtesë që do ta bëjnë ministria dhe policia në njërën anë, me një lloj zbutje te pandemisë në anën tjetër që të krijohet atmosfera në mënyrë që e gjithë kjo dhunë nëpër shkolla e cila i ka mbushur lajmet këtë dimër ti takoje së kaluarës”,tha Kurti./InLajmi/
