Në Gjykatën Komunale në Sllavonski Brod të Kroacisë, shoferi 53-vjeç i autobusit nga Kosova që ishte aksidentuar vitin e kaluar, është dënuar me 6 vjet burgim
Madje shoferi ka pranuar se ishte fajtor për aksidentin në të cilën humbën jetën 10 persona, pra pasagjerë nga Kosova.
Pas këtij vendimi shtetasi i Kosovës është kthyer në burgun ku kishte vuajtur masën e paraburgimit, nga ku do të pres aktgjykimin përfundimtar. Madje mediat kroate raportojnë se shoferi kosovar nuk do të apelojë vendimin, shkruan 24sata.hr.
Kujtojmë që mëngjesin e kobshëm të dielës së 25 korrikut 2021, rreth orës 6:20 në një autostradë tek Sllavonski Brodi, mjeti kishte dalë nga rruga brenda të cilit kishte pasagjerë, kryesisht shtetas të Kosovës që punonin në Gjermani dhe po udhëtonin nga Frankfurit për në Prishtinë, transmeton Telegrafi.
Si pasojë e kësaj 10 pasagjerë kishin humbur jetën dhe 45 të tjerë janë lënduar, ku 15 prej tyre ishin në gjendje të rëndë. E shoferi i autobusit që u arrestua, dyshohet se kishte bërë lëvizje të pakontrolluara derisa po lëviznin.
