Deputeti i Lëvizjes Vetëvendosje, Avni Dehari, në seancën solemne për 7 Marsin ka uruar të gjithë mësimdhënësit shqiptar për Ditën e Mësuesit, duke përfshirë edhe mësuesit dhe mësueset e Luginës së Preshevës, Malit të Zi, Maqedonisë së Veriut e Shqipërisë, raporton InLajmi.
Dehari ka thënë se kjo ditë festohet për nder të shkollës së parë shqipe që u hap në Korçë.
“Dita e mësuesit festohet për nder të shkollës së parë në Korçë, e cila u hap me mund, djers e gjak më 7 mars 1887. Në emër të deputetëve, mësuesit e mësueset që mbajnë ditarin në dorë, pensionistët e pensionistet që kaluan një jetë të tërë me ditarë në dorë, nga zemra ua uroj 7 Marsin, ditën më të rëndësishme në fushën e arsimit tonë”.
Ai ka uruar edhe mësimdhënësit që mbajnë mësim plotësues për mërgimtarët tanë në shtete të ndryshme të Evropës dhe botës.
“Me këtë urim shumë të përzemërt, krahas mësuesve që punojnë në institucionet arsimore, në emrin tuaj dhe në emrin time, ua përcjell urimet edhe mësuesve shqiptarë në Luginën e Preshevës, në Mal të Zi, në Maqedoninë e Veriut dhe në Republikën e Shqipërisë. Këtë urim ua përcjell edhe mësuesve dhe mësueseve që më shumë vështirësi e mbajnë të gjallë arsimin plotësues për mërgimtarët tanë në shtete të ndryshme të Evropës dhe botës”, tha Dehari./InLajmi/
