Në shkolla, sidomos të atyre të ciklit klasor nga klasa një deri në 5 paraqiten probleme të shpeshta tek nxënësit me të cilat psikologu do të ishte njeriu më kompetent të merrej, derisa mungesa e tij përbën mjaft problem, shkruan InLajmi.
E shpesh herë në mungesë të psikologut me këtë punë merren drejtorët e shkollave.
Shpresa Shala, drejtoreshë e shkollës fillore “Xhemail Mustafa” në Prishtinë për Gazetën InLajmi tha se në shkollën që ajo e drejton janë 1.200 nxënës derisa e kanë vetëm një psikolog përgjatë 2 ditëve të javës.
“Një psikolog në vetëm 2 ditë të javës për 1.200 nxënës normalisht se nuk është mjaftueshëm, sidomos duke i parë nevojat dhe problemet e mëdha që mund të jenë”,tha drejtoresha Shala.
Hallin e njëjtë e kanë edhe në shkollën “Ismail Qemali” në kryeqytet.
“Në shkollën tonë kemi një psikolog dhe një pedagog që normalisht që nuk mjaftojnë duke e ditur numrin e madh të nxënësve që e kemi”,tha Mimoza Krasniqi, drejtoreshë e shkollës “Ismail Qemali” në Prishtinë.
Liridon Maliqi, drejtor i shkollës “Model” për Gazetën InLajmi tha se në shkollën të cilën e drejton ai e kanë një psikologe por punon vetëm një herë në javë, e që nuk është e mjaftueshme.
“Edhe po t’i kemi 50 nxënës do duhej psikologia çdo ditë me orar të plotë. E lëre më që shkolla jonë numëron rreth 750 nxënës. Pra kemi shumë nevojë që të kemi psikologen çdo ditë”, tha ai.
Në anën tjetër, psikologu dhe psikoterapisti, Yll Avdijaj për Gazetën InLajmi tha se roli i psikologut në shkollë është shumë i rëndësishëm.
Madje siç tha ai prania e psikologut në shkolla sigurisht që do ta ndihmonte dhe zhvillonte edhe më shumë mbarëvajtjen e proceseve mësimore e po ashtu do t’i kontribuonte rritjes së kualitetit me një cilësi më të lartë të arritjeve në mësime.
“Psikologu mund të jete një faktor shumë i rëndësishëm ndihmues dhe kooperues në zgjidhjen e disa problemeve të cilat mund t’i hasim nëpër shkolla, si vështirësitë e nxënësve në mësime, rënia e motivit të nxënësve dhe ndryshimet në performancën e tyre në mësime, dukuritë negative si bullizmi, sjelljet agresive, mosmarrëveshjet e ndryshme”,tha Avdijaj.
Sipas tij, duke e ditur numrin e madh të nxënësve në shkolla, duhet të jenë nga 2 psikologë.
“Ideja e prezencës së psikologut në shkollë nuk është vetëm sa për ta pasur një vend pune, por roli i tij duhet të jetë kreativ, të zhvilloj aktivitete dhe ligjërata psiko-edukuese me nxënësit dhe mësimdhënësit. Ky rol nuk guxon të paraqitet si të ishte ndonjë rol polici, dhe nxënësit me sjellje të papranueshme të kërcënohen me “do të çoj te psikologu..”, sepse një gjë duhet ditur, psikologu nuk i trajton vetëm sjelljet devijante, por trajton dhe ndihmon në ndërtimin e kontakteve dhe marrdhënieve më të mira përbrenda shkollës”,tha më tej Avdijaj.
Ndërsa nga Ministria e Arsimit kanë deklaruar se vazhdimisht janë të angazhuar në përmirësimin e cilësisë në arsim.
“Roli i psikologëve në shkolla është shumë dimensional. Ata ndihmojnë në krijimin e shkollave të sigurta dhe ambienteve pozitive, duke ndihmuar kështu në mirëqenien e nxënësve dhe përkrahjen e tyre”,tha Iliriana Pylla, zëdhënëse në MASHTI.
Pylla tregoi se aktualisht janë rreth 50 pedagogë dhe 57 psikologë të angazhuar nëpër shkolla në tërë Republikën e Kosovës.
“Numri i psikologëve pritet të rritet vazhdimisht varësisht nga kërkesat dhe nevojat e komunave. Po ashtu në proporcion me numrin e nxënësve angazhohen edhe psikologët nëpër shkolla.Përtej kësaj, MASHTI po punon edhe në ngritjen e kapaciteteve të këtyre profesionistëve me qëllim, përmirësimin e cilësisë së shërbimeve profesionale në shkolla”,theksoi ajo.
Nga Komuna e Prishtinës janë deklaruar fare shkurt lidhur me këtë çështje, duke theksuar se numri i psikologëve në shkolla varet prej numrit të përcaktuar të stafit të tërësishëm në institucionet edukative arsimore dhe aftësuese.
“Nuk mund të tejkalojmë numrin që është. Ky numër është përcaktues për secilën organizatë buxhetore nga Ministria e Financave. Padyshim, se të ardhmen e afërt do t’i kushtojmë rëndësi të veçantë rekrutimit të psikologëve”,bëhet me dije në përgjigjen e Komunës së Prishtinës. Lindita Canolli-Fejzullahi /InLajmi/
