Nënkryetari i Listës Serbe, Dalibor Jevtiq, ka thënë që vendimi i presidentit të Serbisë, Aleksandar Vuçiq, për të mos i vendosur sanksione Rusisë ka qenë i duhur.
Jevtiq ka thënë që çdo shtet ka të drejtë dhe “duhet të ketë të drejtë që të marrë vendime sovrane”.
“Mendoj se presidenti Vuçiq, sikur gjithnjë deri më tani ka marrë vendim vërtetë të guximshëm. Nëse flasim për sovranitet, mendoj se çdo shtet ka të drejtë dhe duhet të ketë të drejtë që të marrë vendime sovrane. Kjo duke pasur parasysh interesin e vendit për të cilin flet përfaqësuesi”, tha ai në një intervistë në Info Magazine në Klan Kosova.
“Nga ajo që shohim e dëgjojmë, padyshim se presionet ndaj presidentit Vuçiq janë të mëdha. Por, secili shtet duhet të drejtohet nga interesat e veta ekonomike, politike dhe mendoj se presidenti Vuçiq dhe shteti i Serbisë ka marrë vendim të guximshëm që mbron interesat e shtetit të Serbisë”, tha ai.
