Drejtori i Agjencisë së Kosovës për Akreditim, Naim Gashi, ka bërë të ditur se i kanë dërguar një letër në shenjë solidarizimi Agjencisë Kombëtare për Sigurimin e Cilësisë së Arsimit të Lartë (NAQA) të Ukrainës, përcjell InLajmi.
Gashi ka njoftuar se në letër thuhet se askush më mirë se kosovarët nuk e kupton se çfarë është gjendja e luftës dhe sa i shtrenjtë është çmimi i lirisë.
Tutje sipas Gashit, AKA i jep përkrahje popullit të Ukrainës duke iu dëshiruar kthim sa më të shpejtë në gjendje normale.
Postimi i plotë nga Agjencia e Kosovës për Akreditim:
Agjencia e Kosovës për Akreditim më 01.03.2022, si anëtare me të drejta të plotë, i është bashkuar iniciativës së Rrjetit të Agjencive të Sigurimit të Cilësisë në Arsimin e Lartë në Evropën Qendrore dhe Lindore (CEENQA), për tu solidarizuar me agjencinë homologe të Ukrainës.
Drejtori i Agjencisë së Kosovës për Akreditim, Naim Gashi, i ka shkruar një letër Agjencisë Kombëtare për Sigurimin e Cilësisë së Arsimit të Lartë (NAQA) të Ukrainës në të cilën thuhet:
Të nderuar kolegë të NAQA,
Në emër të Agjencisë së Kosovës për Akreditim (KAA) ju lutem pranoni keqardhjen time të thellë dhe solidaritetin tonë me përjetimet e popullit të Ukrainës.
Askush më mirë se ne kosovarët nuk e kuptojnë çka është lufta dhe sa i shtrenjtë është çmimi i lirisë. Unë personalisht dhe i gjithë stafi i KAA-së i japim përkrahje popullit të Ukrainës dhe kolegëve tanë të NAQA.
Ne lutemi për paqe për gjithë popullin e Ukrainës dhe kthim sa më të shpejtë në jetën normale./InLajmi/
