“ Marshojmë për pagë dinjitoze” është motoja e Sindikatës së Infermierëve të cilat këtë të martë kanë protestuar në sheshet e Prishtinës deri tek objekti i Qeverisë së Kosovës, raporton InLajmi.
Infermieri Enlirat Duraku, tha se sot protestuan për të drejtat e tyre, derisa theksoi se ndjehen të zhgënjyer lidhur me mënyrën e trajtimit nga organet shtetërore.
Ndërsa, më pas tha se nëse nuk merren parasysh si duhet rangimi i koeficientëve në Ligjin e Pagave, atëherë do të shkojnë me hapat e mëtutjeshëm.
E Naser Rrustemi, kryetar i Odës së Infermierëve tha se kërkojnë që Ligji i Pagave të shkojë më tutje por puna në atë ligj të bëhet si duhet dhe drejtë.
“Ne si odë i kemi përkrahur kërkesat e infermierëve dhe do t’i mbështesim të gjitha kërkesat që janë të drejta. Po kërkojmë që Ligji të shkojë më tutje. Ne nuk po e ndalim, por kemi dëshirë të shkojë Ligji por për krejt i barabartë”,tha më tej ai.
Tutje ai bëri apel te Ministria e Shëndetësisë që t’i plotësojë të gjitha kërkesat e infermierëve në kuadër të Ligjit të Pagave./InLajmi/
