Presidenti i Turqisë, Recep Tayyip Erdogan, ka thënë se vendi i tij e mbështet anëtarësimin e Kosovës në NATO.
Madje, ai tha se për ta bërë një gjë të tillë Turqisë nuk i nevojitet leja e askujt.
“Turqia si vend i rëndësishëm i NATO-s nuk shikon asnjë gjë që nuk shkon për sa i përket anëtarësimit të Kosovës këtu. Për ta mbështetur procesin e anëtarësimit në NATO s’kemi nevojë për të marrë leje nga askush. Ne i kemi ndërmarrë hapat tonë ashtu siç ndërmorën në rastin e njohjes ashtu do të bëjmë edhe për procesin e anëtarësimit të Kosovë në NATO”.
Erdogan foli edhe për njohjet për vendin tonë, që ka kohë që janë ndalur, dhe tha se ka marrë emrat e vendeve që s’e njohin Kosovën nga presidentja Vjosa Osmani e qëndrimin e të cilëve do të përpiqet të ndryshojë.
“Siç e dini, sa i përket çështjes së njohjeve për Kosovën hapi i parë u hodh nga SHBA-ja që ishte shteti i pare që e njohu dhe unë atëherë isha kryeministër dhe ishim duke mbajtur mbledhjen e qeverisë dhe sapo e morëm njoftimin vendi i 2-të që e njohu pavarësinë e Kosovës ishim ne Turqia. Po ashtu edhe në procesin e njohjeve në vijim për Kosovën i ndërmorëm të gjitha hapat. Unë në atë kohë si kryeministër bashkë me ministrat nëpërmjet takimeve dhe kontakteve me homologë e përshpejtuam procesin e njohjeve për Kosovën dhe ende vazhdojmë ta ndjekim këtë proces”, tha ai, transmeton Klankosova.tv.
“Në të njëjtën mënyrë vazhdojnë takimet dhe kontaktet tona për të sjellë njohje të reja nga vendet që nuk e kanë bërë. Vjosa Osmani në takimin që e patëm tête-à-tête (ballë për ballë) më dha emrat e disa vendeve për të siguruar njohje të reja të Kosovës dhe urojmë që të kemi njohje të reja”.
