Sekretarja e Jashtme e Britanisë së Madhe, Liz Truss njoftoi se mbështet “absolutisht” shtetasit britanikë që do të luftojnë në Ukrainë “nëse kjo është ajo që ata duan të bëjnë”.
“E mbështes dhe sigurisht kjo është një gjë që njerëzit do të mund të vendosin vetë. Populli i Ukrainës nuk lufton vetëm për veten e tij por për të gjithë Evropën, lufton për lirinë dhe demokracinë sepse kjo është ajo që Putini sfidon. Absolutisht, nëse njerëzit duan të mbështesin këtë luftë, unë i mbështes që ata ta bëjnë këtë”, nështë përgjigjur Truss në një deklaratë për BBC lidhur me sulmin e Rusisë ndaj Ukrainës.
Në pyetjen e gazetarit: “Pra ju i mbështesni njerëzit që shkojnë nga Britania për ndihmë ndaj luftës në Ukrainë?”, sekretarja Truss tha: “Absolutisht, nëse kjo është ajo që ata duan të bëjnë”.
Kujtojmë se në Ukrainë ka nisur procesi për formimin e njësisë së quajtur “Legjioni Ndërkombëtar për Mbrojtjen Rajonale” i cili është i destinuar për vullnetarët e huaj që duan të luftojnë kundër sulmit rus në atë vend, transmeton Anadolu Agency.
Në një deklaratë nga Zyra e Presidentit të Ukrainës thuhet se sulmi rus nuk është thjesht një pushtim i Ukrainës, por fillimi i një lufte kundër Evropës dhe rendit juridik botëror.
