Përfaqësuesi i Lartë i BE-së Josep Borrell tha se BE-ja është e shqetësuar se kriza në Ukrainë mund të përhapet në Ballkanin Perëndimor, Gjeorgji dhe Moldavi, transmeton InLajmi.
Të dielën, më 27 shkurt, Borrell mori pjesë në një konferencë shtypi për mediat pas një takimi të Këshillit të Ministrave të Jashtëm. Këshilli miratoi një sërë masash për të ndihmuar Ukrainën, duke përfshirë ndihmën me armë, për të vendosur sanksione kundër Rusisë dhe për të ndaluar përhapjen e dezinformatave.
Gjatë fjalimit të tij, Borrell tha se BE-ja është e shqetësuar për atë që mund të ndodhë në të gjithë rajonin. Rusia nuk do të ndalet në Ukrainë. Dhe ndikimi rus mund të fillojë të funksionojë në vendet fqinje, Moldavi dhe Gjeorgji, dhe gjithashtu do të ketë një ndikim në Ballkanin Perëndimor. Kështu që ne duhet t’i kushtojmë shumë vëmendje asaj që po ndodh atje.
“Duhet të qëndrojmë vigjilentë ndaj ndikimit të krizës në Ballkanin Perëndimor dhe të shohim se çfarë po ndodh në pozicionin, në shtrirjen e vendeve të Ballkanit, të kandidatëve tanë në Bashkimin Evropian, përafrimin e tyre me politikën tonë të jashtme.
Pas pushtimit të Ukrainës nga Rusia, shumica e vendeve në Ballkanin Perëndimor janë rreshtuar me Bashkimin Evropian, duke dënuar Rusinë dhe duke vendosur sanksione kundër saj.
E vetmja që u veçua deri më tani ka qenë Serbia, aleati më i fortë i Rusisë në rajon. Ndërsa Serbia ka deklaruar se mbështet integritetin territorial të Ukrainës, ajo nuk e ka dënuar pushtimin e Rusisë, shkruan Exit.al.
Presidentja e Kosovës, Vjosa Osmani, javën e kaluar ngriti shqetësimet se Rusia do të përdorë Serbinë për të destabilizuar Ballkanin Perëndimor. /InLajmi/
