Shkruan: Muhamedin Kullashi
Njeri nga shpjegimet për arsyet e presidentit rus Putin që të sulmoj Ukrainën, sipas disa analistëve francez, thekson ashpërsimin e qëndrimeve të regjimit të Kremlinit ndaj zhvillimeve në vendet fqinje, në rradhë të parë të Ukrainës, që tregojn shenja të demokratizimit të sistemeve të tyre politike dhe të shoqërive të tyre.Sulmi i Rusisë mbi Ukrainën si një luftë frontale shfaqet si agresion ushtarak me përmasat më të mëdha në Evropë që nga Lufta e dytë botërore(Fenoglio në « Le Monde »).
Sipas vrojtuesëve gjeopolitik ky agresion është përgaditur hollësisht më heret : ai aryetohet si vullnet politik për ta thyer regjimin politik të Ukrainës të cilin e shikon si kontestim politik të regjimit të vet autoritar.Regjimi i Putinit e shpalosë në mënyrë të hapur synimin që ta shkel Ukraninën e njëherazi bën të ditur se nuk do të toleroj asnjë kundërshtim të brendshëm në Ukrainë e as ato të jashtmet që mund të vijn nga vendet demokratike perëndimore.
Në fjalimin në të cilin paralajmëroi agresionin e Rusisë mbi Ukrainën Putini bëri të ditur se : « Kushdo që mendon se mund të na kundërvihet në rrugëtimin tonë apo ta kërcenojë vendin tonë do të ketë pasoja të papara në histori ». Kësisoj ai nuk e fsheh e as nuk e arsyeton agresonin me ndonjë gabim të vendeve perëndimore.
Ky vullnet për ta imponuar në Evropë dhe në botë ligjin e të fortit në fakt shpërfillë çfarëdo norme të së drejtës ndërkombëtare. Hulumtuesit e politikës së Rusisë kanë vërë në shesh se Putini që nga ardhja e tij në pushtet në vitin 2000 ka vendosur një kontroll gjithpërfshirës mbi shoqërinë civile të Rusisë. Arrestimet dhe vrasjet e gazetarëve dhe veprimtarëve të shoqërisë civile që kritikonin regjimin, pengimi i protestave kundër politikës së tij autokratike dhe qeverisjes së tij e cila ndrydhë manifestimin e pluralitetit të opcioneve politike karakterizojn rrjedhën e politikës së Putinit.
Regjimi i Putinit gjatë viteve ka ndëshkuar dhe përndjekur ashpërsisht bartësit jo aq të shumtë të kritikave ndaj tij, qofshin gazetarë, deputetë apo këshilltarë në nivele të ndryshme të sistemit.Karakteri represiv i këtij regjimi i ka tiparet e regjimit komunist sovjetik, boshti kurrizor i të cilit ishte policia politike NKVD-ja, aktor i së cilës ishte Putini.
Është theksuar shpesh nga vrojtuesit e politikës së regjimit autokratik rus se ndryshimet politike, me tipare demokratike, në Ukrainë u bën një kontestim dhe një kritikë nga jashtë e padurueshme. Agresioni i Putinit mbi Ukrainën ka një objektiv të dyfisht : në politikën ndërkombëtare dhe në atë të brendshme ta imponoj dhunën ushtarake si mjet për të penguar procese politike demokratike jo vetëm brenda Rusisë por edhe te vendet që janë bërë të pavarura me shembjen e Bashkimit sovjetik. Pushtimi i Ukrainës përmban në vete edhe synimin që disi të kompenzojë humbjen e fuqisë së perandorisë staliniste.
Me luftën kundër Ukrainës, popullit dhe regjimit të saj politik, me kërcënimet ndaj gjithë atyre që mund t’i dalin përpara Rusia e Putinit dëshiron t’i imponoj rregullat e veta arbitrare e njëherazi t’ia siguroj vetes një pozicion të ri në skenën ndërkombëtare.
