Sulmet e Rusisë në Ukrainë nuk kanë të ndalur, derisa pothuajse të gjitha vendet e botës po i dënojnë këto sulme, sikurse edhe vendi jonë, shkruan InLajmi.
Por, duke e ditur se ende Serbia nuk e ka njohur pavarësinë e Kosovës dhe se ende vendi jonë nuk është anëtarësuar në Aleancën e NATO-s, a do të paraqet kjo rrezik, eksperti i sigurisë, Avni Islami në një prononcim për Gazetën InLajmi tha se kjo nuk mund të ndodhë.
Madje ai tha se qytetarët e Kosovës nuk duhet të shqetësohen sepse vendin tonë e mbikëqyrin forcat e KFOR-it.
“Për shkak se pozita gjeopolitike dhe gjeostrategjike në Kosovë dhe e Ukrainës janë të ndryshme, absolutisht nuk mund të themi se Kosova është e rrezikuar nga kushdo qoftë, nga Serbia e cila në vazhdimësi përpiqet që ta destibalizojë Kosovën, apo nga një vend që është Rusia e cila duhet t’i kalojë disa shtete të NATO-s që të ndërmerr një hap në raport me Kosovën. Duke e pasur parasysh që Kosova është e njohur ndërkombëtarisht nga mbi 100 shtete dhe aktualisht në Kosovë janë forcat e NATO-s, KFOR –i, që është i mandatuar edhe me rezolutë të Këshillit të Sigurimit 1244, unë nuk mendoj që Kosova rrezikohet momentalisht nga Serbia”,tha Islami për Gazetën InLajmi.
E kjo tha ai, asesi nuk mund të ndodhë për shkak se pozita e Serbisë, sipas tij nuk është e favorshme shumë që ta sulmojë Kosovën.
“Unë nuk pres të ketë ndonjë incident apo provokim nga ana e Serbisë, aq më tepër kur ajo pretendon që të jetë pjesë e Bashkimit Evropian dhe strukturave tjera të Evropës. Kështu që Kosova nuk duhet të shqetësohet por pavarësisht kësaj ne duhet jemi të gatshëm për çfarëdo sfide që mund të na ndodhë në Kosovë, kemi ushtrinë e FSK-së”,shtoi më tej ai.
Në anën tjetër, Islami thotë se edhe përkundër faktit që vendi ynë mbikëqyret nga forcat e KFOR-it, përsëri vendi ynë duhet të jetë i përgatitur për çdo gjë.
“Edhe përkundër kësaj ushtria jonë, vendi jonë duhet të jemi të përgatitur. Çfarëdo tendence që të ndërhyj në territorin e Kosovës llogaritet si atak ndaj Aleancës Veriatlantike të NATO-s. Edhe pse nuk jemi të anëtarësuar në Aleancë i kemi forcat e NATO-s në vendin tonë”,deklaroi analisti i sigurisë, Islami
Më tej, ai tha se është shumë historike që pa procedura të stërngarkuara, Kosova të pranohet në Aleancën Veriatlantike dhe të jetë pjesë e NATO-s.
“Kjo do ta stabilizonte jo vetëm situatën në Kosovë por edhe situatën në Ballkan por edhe më gjerë”,tha ai./InLajmi/
